ABANCA activa liñas de financiamento sostible para os agricultores do Bierzo
- A entidade financeira pon ao dispor da Asociación Berciana de Agricultores opcións de crédito para mellorar a eficiencia enerxética e o aproveitamento das enerxías limpas
- O banco ofrece o seu catálogo de produtos adaptado ao sector e xestores especializados no mundo agro que reforzarán a atención comercial nas oficinas da comarca
De esquerda a dereita, o coordinador de ABANCA Agro, Alfonso García Marcos, o presidente da Asociación Berciana de Agricultores, José Angel Bodelón López, e o director de zona León Provincia de ABANCA, Pedro Vidal Núñez.
ABANCA e a Asociación Berciana de Agricultores (ABA), que agrupa aos produtores de pera, cereixa e castaña desta área xeográfica, asinaron un novo convenio financeiro que responde ás necesidades dos integrantes deste colectivo. Os asociados poderán acceder á oferta completa da entidade financeira para facer fronte ás necesidades do día a día e afrontar investimentos.
Na sinatura, que evidencia o compromiso de ABANCA co sector agrícola e co tecido produtivo desta comarca leonesa, participaron o presidente da asociación, José Angel Bodelón López, o director de zona de ABANCA en León Provincia, Pedro Vidal Núñez, e o coordinador de ABANCA Agro, Alfonso García Marcos.
Grazas a este novo acordo, os agricultores asociados accederán a alternativas de financiamento con condicións melloradas para os investimentos relacionados coa sostibilidade. Destacan os préstamos persoais ou hipotecarios, así como o leasing, con prazos de amortización amplos e a posibilidade de incluír carencias. Esta nova liña inclúe respostas para a mellora da eficiencia enerxética, a modernización das explotacións, a adquisición de vehículos eléctricos ou híbridos ou calquera medida que supoña un aforro do consumo eléctrico.
O convenio tamén pon ao dispor dos produtores préstamos específicos e liñas de comercio exterior, ademais de financiamento a través de leasing, confirming, factoring ou avais para a modernización dos regadíos ou a compra de maquinaria e leiras. Así mesmo, os interesados poderán acceder ás liñas de crédito (liquidez e investimento) que activou o MAPA a través de SAECA, o ICO, así como ao financiamento de proxectos e investimentos a través do Instrumento Financiero de Gestión Centralizada da Junta de Castilla y León.
O texto tamén reserva espazo para as necesidades correntes dos agricultores do Bierzo. É o caso da póliza de crédito para financiar os gastos do día a día da actividade, cun prazo máximo de ata 5 anos. Estes profesionais do campo tamén poderán optar aos anticipos de subvencións ou impostos, unha alternativa flexible para as necesidades da campaña.
Da mesma maneira, os agricultores poderán acceder ao catálogo de seguros de ABANCA para o sector primario, como a liña AgroSeguro, o Seguro de Explotación Agraria ou o Seguro de Maquinaria Agrícola, entre outros. As primas destes seguros poderanse financiar sen intereses e pagar de forma fraccionada ata en 12 meses.