ABANCA, Afundación e a UIE súmanse mañá á Hora do Planeta
- Unha vintena de edificios corporativos do banco, a súa Obra Social e a Universidade Intercontinental da Empresa apagarán a súa iluminación entre as 20.30 e as 21.30 horas
- ABANCA, Afundación e a UIE participan nesta iniciativa no marco do seu compromiso co medio ambiente e os ODS
Descarga en alta resolución Serás redirixido a outro sitio web e abrirase nunha nova ventá
ABANCA, Afundación e a Universidade Intercontinental da Empresa (UIE) vanse sumar mañá sábado, 23 de marzo, á iniciativa global de sensibilización ambiental A Hora do PlanetaSerás redirixido a outro sitio web, que promove desde 2007 WWF.
O banco, a súa obra social e a universidade participarán de novo nesta campaña que busca chamar a atención sobre o problema do cambio climático co apagado simbólico durante 60 minutos, de 20.30 a 21.30 horas, das fachadas de 21 dos seus edificios corporativos máis representativos nas principais cidades galegas e Madrid.
En concreto, ABANCA deixará sen iluminación na Coruña a súa sede principal (Rúa Nova, 30), a sede de ABANCA Seguros (Rega de Auga, 3), a oficina da Praza de Lugo e a pantalla situada no Obelisco. En Vigo sumarase a sede de García Barbón; en Madrid, o edificio corporativo de Recoletos, 4, e Espazo Serrano, 45; e tamén quedarán ás escuras as oficinas principais de Lugo, Ourense, Mérida, Oviedo, Sevilla, León e Santiago de Compostela.
Afundación apagará as fachadas e pantallas led das súas sedes da Coruña, Vigo e Ourense, o Teatro Afundación de Vigo e a iluminación do xardín da Residencia de Estudantes que ten en Pontevedra. Pola súa banda, a UIE suspenderá durante esa hora a iluminación dos rótulos luminosos das fachadas das súas sedes da Coruña e Vigo.
ABANCA, Afundación e a UIE únense a esta nova edición da Hora do Planeta no marco do seu compromiso co medio ambiente e a concienciación en materia de cambio climático. As tres organizacións situaron a sostibilidade no centro da súa estratexia e impulsan diferentes iniciativas dirixidas á conservación da biodiversidade, así como a promover un modelo social e económico máis sostible e respectuoso coa nosa contorna e cos dereitos das persoas.