ABANCA alcanzará o 80,46% de Nueva Pescanova e tomará o control da compañía
- A operación formalizarase nas próximas semanas e ten como obxectivo salvagardar unha empresa fundamental para Galicia
- O banco reforzará a estrutura financeira da compañía para potenciar e facer crecer o seu proxecto empresarial
- ABANCA avanzará na procura dun socio industrial que permita construír un proxecto de valor a longo prazo desde Galicia
Descarga en alta resolución Serás redirixido a outro sitio web e abrirase nunha nova ventá
ABANCA tomará o control de Nueva Pescanova tras culminarse unha operación na que adquirirá un paquete de títulos, ata agora propiedade de Banco Sabadell e Caixabank, equivalente ao 39,8% do seu capital. Tras esta compra, ABANCA será titular do 80,46% das accións da pesqueira. A operación formalizarase nas próximas semanas co obxectivo de salvagardar unha empresa fundamental para Galicia.
O plan de ABANCA inclúe reforzar a estrutura financeira da compañía e os seus principais ámbitos de actividade corporativa e comercial. Para iso afianzará as mellores prácticas de goberno corporativo e aplicará melloras no ámbito da xestión, todo iso co obxectivo de fortalecer o seu posicionamento competitivo e potenciar o seu crecemento.
De acordo co seu plan, ABANCA reterá unha participación importante no accionariado de Nueva Pescanova para avanzar na procura dun socio industrial que permita construír un proxecto de valor a longo prazo desde Galicia.
Ademais, entre os obxectivos da operación está devolver os órganos de decisión da compañía a Galicia e reforzar o apoio de ABANCA ao complexo industrial relacionado co mar, no que Galicia é unha das comunidades líderes no mundo.
A operación porá fin a un proceso desenvolvido ao longo dos últimos anos a través do cal ABANCA incrementou paulatinamente a súa participación no accionariado de Nueva Pescanova desde un 5,465% inicial ata o 40,66% previo a esta adquisición.