ABANCA alíase con Stonegal para impulsar a celebración da primeira feira de pedra natural de España
- O evento, que terá lugar do 3 ao 5 de xuño, pretende reunir no IFEVI de Vigo a máis de 150 empresas dunha ducia de países
- A cita busca reforzar a relevancia dun sector estratéxico que permite a Galicia liderar a extracción e transformación deste recurso natural
O director territorial de ABANCA en Vigo, Walter Álvarez, no centro da imaxe; o responsable de Stonegal, Alejandro Miras, segundo pola dereita; e outros representantes de ambas entidades durante o encontro.
Descarga en alta resolución Serás redirixido a outro sitio web e abrirase nunha nova ventá
No centro, o director territorial de ABANCA en Vigo, Walter Álvarez, e o responsable de Stonegal, Alejandro Miras, na esquerda da imaxe; durante a sinatura do convenio.
Descarga en alta resolución Serás redirixido a outro sitio web e abrirase nunha nova ventá
ABANCA apoiará a celebración de Stonegal, o primeiro evento sectorial que se celebra no noso país dedicado exclusivamente á pedra natural. A entidade financeira súmase así a unha cita que terá lugar do 3 ao 5 de xuño no Instituto Feiral de Vigo (IFEVI) e que aspira a consolidarse como un dos grandes eventos empresariais do noroeste peninsular.
O director territorial de ABANCA en Vigo, Walter Álvarez, e o responsable de Stonegal, Alejandro Miras, foron os encargados de asinar o protocolo de colaboración entre ambas as entidades na sede institucional do banco en Vigo. ABANCA dá o seu apoio a esta primeira edición da feira e demostra o seu compromiso cos retos do sector da pedra natural. Con este acordo, o banco tamén apoiará a celebración de actividades paralelas á feira como a Gala Stonegal ou a entrega dos Premios Stonegal. ABANCA terá unha forte presenza de imaxe e comercial.
A feira de Stonegal prevé reunir a máis de 150 empresas dedicadas á extracción e transformación deste recurso natural. Entre os expositores xa confirmados haberá unha presenza relevante de firmas europeas, americanas e asiáticas. A feira pretende contar coa asistencia de 3.000 profesionais do sector da pedra.
Para o director territorial de ABANCA en Vigo, Walter Álvarez, “o apoio a esta feira permite ao banco apostar por un sector moi relevante da economía produtiva desta zona xeográfica e avanzar nos retos estratéxicos que se van presentar nos próximos anos”. Na súa intervención tamén quixo destacar “a experiencia de ABANCA como aliado estratéxico e o coñecemento efectivo do sector”.
Pola súa banda, o responsable de Stonegal, Alejandro Miras, quixo destacar que “Stonegal é froito dun proxecto que se vén desenvolvendo nos últimos anos e que suporá un punto de inflexión no sector da pedra natural e o seu papel na arquitectura dos próximos anos. Posiciona a Vigo como a capital da industria en 2025 e a súa consolidación suporá á súa vez a do IFEVI como centro de congresos de referencia no noroeste peninsular”.