ABANCA amplía o seu catálogo de produtos de investimento responsable con dous novos fondos para xestión discrecional de carteiras

04-06-2021

ABANCA lanzará de maneira inminente ao mercado dous novos fondos de investimento sostibles marca ABANCA destinados exclusivamente ao servizo de xestión discrecional de carteiras (GDC). Con eles a entidade incrementa a presenza dos criterios ESG (medioambientais, sociais e bo goberno) no seu catálogo de produtos e servizos financeiros. Ambos os produtos clasificáronse como artigo 8 de SFDR, o Regulamento de Divulgación de Finanzas Sostibles da UE, ao promover características medioambientais ou sociais.

A Comisión Nacional do Mercado de Valores (CNMV) comunicou xa a aprobación ao lanzamento dos dous fondos, ABANCA Renta Variable ESG 360, FI e ABANCA Renta Fija ESG 360, FI. A súa incorporación ao catálogo de produtos de ABANCA inscríbese na liña de acción socioeconómica do Plan de Acción de Banca Responsable e Sostible ABANCA 2021-2024, co obxectivo específico de impulsar a transformación da economía cara a un novo modelo baseado na sostibilidade.

O lanzamento de de ABANCA Renta Variable ESG 360, FI e ABANCA Renta Fija ESG 360, FI producirase a próxima semana baixo o servizo de xestión discrecional de carteiras. Estes dous fondos atópanse entre os primeiros produtos de investimento da recentemente lanzada Cartera ABANCA 360, un servizo de xestión de carteiras que aúna xestión activa, xestión pasiva e sostibilidade. Con esta nova opción de investimento, ABANCA amplía o número de clientes que poden acceder ao servizo de xestión de carteiras, ao reducir o importe mínimo de investimento a 3.000 euros. O servizo de xestión de carteiras estaba até agora limitado aos clientes de ABANCA Privada e ABANCA Personal, con limiares de entrada superiores.

Este servizo segue o modelo Alpha360, marco metodolóxico que combina as capacidades e expertise dos xestores da entidade coas ferramentas de intelixencia artificial, e aplícase durante todo o proceso de análise, xestión, control e toma de decisións de investimento. Os produtos e servizos xestionados baixo o modelo Alpha360 contan cunha valoración moi positiva por parte dos clientes, tanto pola rendibilidade axustada ao risco como polo comportamento en momentos complexos de mercado, como o ano 2020, no que contiveron as caídas nos peores momentos da crise e finalmente todas as estratexias e perfís pecharon en terreo positivo.

O primeiro dos dous fondos aprobados, denominado ABANCA Renta Variable ESG 360, FI, replica a composición do índice MSCI World Eur ESG Leaders, no que figuran as principais compañías cotizadas do mundo en materia de investimento socialmente responsable. O segundo, ABANCA Renta Fija ESG 360, FI, replica o índice Bloomberg Barclays MSCI Euro Corporate Sustainable & SRI, composto por aproximadamente 2.200 emisións de bonos corporativos con categoría de grao de investimento. Ambos os fondos son xestionados por Imantia Capital, SGIIC, SA.