ABANCA anticipa ata 1.500 euros do desemprego a clientes en situación de ERTE en Estremadura
- Entidade financeira e Junta de Estremadura subscriben un convenio dirixido a compensar o impacto do COVID-19 sobre os ingresos dos empregados de empresas afectadas por Expedientes de Regulación Temporal de Emprego
- O anticipo realizarase a través dun préstamo sen intereses que cobre ata 750 euros por mes e empregado e ten unha duración máxima de seis meses
Descarga en alta resolución Serás redirixido a outro sitio web e abrirase nunha nova ventá
ABANCA e a Junta de Estremadura subscribiron un convenio de colaboración a través do cal a entidade financeira adiantará ata un máximo de 1.500 euros da prestación por desemprego dos seus clientes na rexión afectados por Expedientes de Regulación Temporal de Emprego motivados polo COVID-19.
Este adianto, dirixido a clientes que non comezaron a recibir a súa prestación de desemprego, realizarase a través dun préstamo sen intereses por importe máximo de 750 euros por traballador e mes. A cantidade total adiantada non superará o importe máximo de dúas mensualidades, isto é, 1.500 euros. A duración máxima do préstamo será de seis meses e para a súa formalización non se esixirán garantías nin será necesaria a tramitación a través de documento público.
O préstamo concedido por ABANCA ten como finalidade exclusiva proporcionar recursos aos clientes que non comezaron a recibir a prestación que lles corresponde por estar afectados por un ERTE. O procedemento de solicitude destes préstamos deberá ser iniciado polo traballador afectado dirixíndose a ABANCA. Unha vez aprobada a operación, o abono do anticipo realizarase directamente na conta do cliente.
Plan de acción fronte ao COVID-19
Esta iniciativa forma parte de plan de acción de ABANCA para afrontar as consecuencias da emerxencia sanitaria do COVID-19. O plan, que está centrado na protección e as necesidades financeiras e de operatividade das persoas, conta con iniciativas específicas para tres colectivos diferenciados: os empregados que compoñen o equipo do banco, os clientes, tanto empresas como particulares, e o conxunto da sociedade.
As actuacións dirixidas aos clientes están enfocadas a garantir a súa protección nas súas visitas ás oficinas, a satisfacer as súas necesidades financeiras e a ofrecerlles distintas canles a distancia para a realización das súas operacións.
Entre as dirixidas a clientes particulares destacan o lanzamento de produtos de financiamento para persoas en situación de ERTE/ERE, a moratoria financeira para operacións hipotecarias e persoais, a validación automática de condicións de produtos e servizos para clientes que as viñan cumprindo, a condonación de tres mensualidades de aluguer a familias residentes en inmobles do Fondo Social de Vivenda, e o anticipo de pensións e prestacións por desemprego.
De cara ás empresas e autónomos, o banco lanzou, entre outras actuacións, o Plan Anticipar, dotado de 7.900 millóns de euros en financiamento para o tecido produtivo. Ademais, está a desenvolver unha elevada actividade na formalización de operacións de financiamento en colaboración co ICO e outros organismos e entidades, e está a activar prórrogas, renovacións automáticas e ampliación de límites en operacións de financiamento vixentes. Dentro da liña ICO xestionou 9.469 operacións de pemes e autónomos por un importe de 893 millóns e 364 operacións doutras empresas por un total de 547 millóns de euros (a peche do mes de abril).