ABANCA apoia o 800 aniversario de Betanzos co patrocinio dun concerto da OSG
- José Trigueros dirixirá a Orquestra Sinfónica de Galicia o 22 de agosto na Praza García Hermanos
- O banco mantén un firme compromiso coa promoción e divulgación das artes escénicas e musicais e neste marco encádrase este acordo
De esquerda a dereita: o xerente da OSG, Andrés Lacasa, a alcaldesa de Betanzos, María Barral, e o presidente de Honor de ABANCA, Javier Etcheverría.
Descarga en alta resolución Serás redirixido a outro sitio web e abrirase nunha nova ventá
ABANCA patrocinará o concerto que a Orquestra Sinfónica de Galicia ofrecerá, o próximo 22 de agosto, na Praza de García Hermanos de Betanzos, para conmemorar o 800 Aniversario da cidade.
A OSG estará dirixida por José Trigueros e interpretará un programa que inclúe un repertorio popular con grandes éxitos da música sinfónica, desde a suite ‘Carmen’ de Georges Bizet e o ‘Capricho español, op.34’ de Nikolai Rimski-Kórsakov, até música latinoamericana coa obra ‘Oblivion’ de Astor Piazzolla e ‘Danzón nº2’ de Arturo Márquez. O evento musical, de carácter gratuíto, será ás 21.00 horas.
A cidade de Betanzos celebra durante este 2019 o oitavo centenario do traslado á súa localización actual. Para conmemorar este aniversario, o concello desenvolveu unha completa programación durante todo o ano na que se inclúe este concerto gratuíto da OSG patrocinado por ABANCA.
ABANCA mantén un firme compromiso coa promoción e divulgación das artes escénicas e musicais e neste marco encádrase este acordo co concello de Betanzos, a Deputación de A Coruña e a Orquestra Sinfónica de Galicia.