ABANCA Bierzo Innova e Emprende pon as bases para unha rede estable de emprendedores na comarca

25-11-2015

O encontro ABANCA Bierzo Innova e Emprende celebrouse hoxe en Ponferrada coa participación de 40 emprendedores que debateron o estado da creación de empresas na comarca e elaboraron un mapa de conclusións para dinamizar o emprendemento. Este evento, impulsado por ABANCA dentro da súa estratexia de responsabilidade social corporativa, naceu do dobre obxectivo de compartir as experiencias acumuladas polos emprendedores bercianos nos seus respectivos proxectos e dar os primeiros pasos cara unha rede estable de colaboración entre empresas nacentes.

Juan Carlos Escotet Rodríguez, vicepresidente de ABANCA, cerrou o evento cunha intervención na que destacou, como guías da súa propia traxectoria como empresario de orixe leonesa, “a necesidade de innovar en todos os aspectos do negocio e a constante vocación de servizo, situando sempre as necesidades do cliente no centro do noso labor”.

“Con esta iniciativa queriamos facer posible o coñecemento persoal entre estas 40 persoas e os seus proxectos, nun ambiente relaxado e á vez útil e frutífero: confrontar ideas e soños, facer net-working, compartir coñecemento, aprender en común e reflexionar xuntos tanto sobre as nosas dificultades como traballadores, empresarios e inversores, como sobre as vantaxes e inconvenientes de facer todo isto aquí, en El Bierzo”, sinala Valentín Carrera, escritor, periodista e promotor da iniciativa.

Sesións de traballo e conclusións

O encontro estivo estruturado en dúas sesións de traballo. Na primeira participaron cinco mesas sectoriais integradas, respectivamente, por emprendedores do sector agrícola, natureza e comercio directo, o turismo e a hostalería, a gastronomía, viños e cervexas artesás, ONG´s e servizos á comunidade, e Internet e creación cultural. Estas mesas encargáronse de analizar e diagnosticar os problemas do emprendemento.

A segunda sesión agrupou cinco mesas transversais para analizar posibles vías de mellora nos ámbitos da colaboración entre proxectos, o apoio público, o financiamento e a responsabilidade social. Entre as propostas lanzadas destacan a creación de clusters, o incremento da formación, o reforzo da coordinación entre administracións, a simplificación dos trámites administrativos, a énfase nos valores e recursos naturais da comarca, o aproveitamento das posibilidades asociadas ao Camiño de Santiago, ou o apoio financeiro aos proxectos que primen a responsabilidade social.

ABANCA e o emprendemento

A xornada incluíu tamén un relatorio a cargo de Miguel Ángel Escotet, director xeral de Responsabilidade Social Corporativa e Comunicación de ABANCA, quen expuxo ante os asistentes o modelo de apoio ao emprendemento de ABANCA. “Lanzaremos dous grandes bloques de accións dirixidas, por un lado, a favorecer a obtención de recursos para a posta en marcha de novos proxectos, e, por outro, a potenciar o coñecemento, a formación e o asesoramento”, anunciou.