ABANCA busca startups para desenvolver a próxima xeración de servizos financeiros
- A entidade orienta a 13ª edición de ABANCA Innova cara a tecnoloxías relacionadas con intelixencia artificial, tokenización e criptoactivos
- O banco quere aproveitar a seguridade xurídica que brinda o novo escenario regulatorio europeo para integrar solucións de IA e activos dixitais en servizos cotiáns para particulares e empresas
- As empresas emerxentes interesadas en validar as súas propostas nunha contorna bancaria real teñen de prazo ata o 15 de outubro para presentar a súa candidatura ao programa
Espazo ABANCA Innova.
Descarga en alta resolución Serás redirixido a outro sitio web e abrirase nunha nova ventá
ABANCA abriu o prazo de inscrición para a décimo terceira edición do seu programa de Venture Client, ABANCA Innova. Nesta ocasión, a entidade financeira busca identificar e atraer startups tecnolóxicas capaces de deseñar a próxima xeración de servizos financeiros, cun foco especial na intelixencia artificial, os activos dixitais e a tokenización.
O lanzamento desta convocatoria responde a un momento decisivo para o sector financeiro europeo. A recente entrada en vigor do Regulamento MiCA (Markets in Crypto-Assets) establece, por primeira vez, un marco xurídico común e seguro para a emisión, custodia e prestación de servizos de criptoactivos. Esta certeza regulatoria permite á banca empezar a aplicar estas tecnoloxías en servizos cotiáns para particulares e empresas, que permitirán axilizar procesos como a concesión de financiamento, a atención ao cliente, a xestión documental ou a prevención da fraude, reducindo tempos de resposta e mellorando a experiencia dos usuarios.
Consciente desta transformación, ABANCA orienta a nova edición do seu programa ABANCA Innova cara a startups capaces de desenvolver solucións aplicables aos principais retos do negocio financeiro. O programa poñerá o foco en propostas relacionadas con intelixencia artificial, activos dixitais e procesos de tokenización para representar activos do mundo real mediante tecnoloxía de rede de bloques ou blockchain. No entanto, a convocatoria tamén seguirá aberta a outras tecnoloxías disruptivas capaces de achegar valor á actividade bancaria.
Entre os ámbitos de innovación demandados figuran a xestión do risco e o compliance, mercadotecnia, procesos tecnolóxicos, mellora da eficiencia operativa, ciberseguridade, sustentabilidade e novos servizos financeiros baseados en activos dixitais.
O obxectivo de ABANCA non é unicamente identificar novas tecnoloxías, senón validar a súa aplicación mediante proxectos reais que permitan acelerar a súa incorporación á actividade do banco.
Unha convocatoria orientada a proxectos reais
As startups interesadas poden presentar as súas candidaturas ata o 15 de outubro a través da páxina web do programa de ABANCA Innova. Tras o peche das candidaturas, os proxectos preseleccionados serán avaliados nun workshop con profesionais de distintas áreas do banco para analizar os posibles casos de uso das súas solucións. Aqueles con maior potencial accederán a un bootcamp técnico, no que se definirá o alcance dunha proba de concepto (PoC, polas súas siglas en inglés), avaliaranse os requisitos técnicos e prepararase a súa implantación nunha contorna real.
As startups que superen este proceso selectivo poderán desenvolver proxectos pilotos xunto a distintas unidades de negocio de ABANCA, validando a súa proposta de valor directamente sobre necesidades reais do banco.
Con esta 13ª edición, ABANCA consolida unha das principais iniciativas de innovación aberta de España. Desde a súa creación, o programa de ABANCA Innova avaliou máis dun milleiro de candidaturas e completou 26 probas de concepto, converténdose nunha ponte efectiva entre o talento emprendedor e a industria financeira.
Alén do acompañamento por parte de profesionais de distintas áreas do banco e da colaboración da consultora especializada HubIN, o programa ofrece acceso aos espazos de coworking de ABANCA Innova na Coruña e Vigo, así como a posibilidade de participar en eventos e actividades de investimento dentro do ecosistema nacional de emprendemento.