ABANCA colabora con Cruz Vermella na campaña ‘Hai moitos xoguetes. Unha maneira de axudar’

02-12-2015

ABANCA Obra Social colaborará por segundo ano consecutivo coa Cruz Vermella na campaña ‘Hai moitos xoguetes. Unha maneira de axudar’ coa que se pretende recoller xoguetes para os nenos, nenas e adolescentes galegos en situación máis vulnerable.

A entidade financeira porá a disposición da Cruz Vermella seis locais situados na Coruña (rúa Sol, 20), Santiago (Hórreo, 11), Lugo (Praza de Santo Domingo, 20), Pontevedra (Gagos de Mendoza 2), Vigo (Rosalía de Castro, 36) e Ourense (Avenida Santiago, 53) para a recollida e entrega de xoguetes. Ademais, os profesionais de ABANCA colaborarán como voluntarios doando xoguetes e participando tamén na recollida e entrega dos mesmos.

O perfil das familias que se verán beneficiadas con esta campaña é o daquelas que non dispoñen de moitos recursos económicos, ao carecer de ingresos estables, fundamentalmente como consecuencia da falta de emprego.

A posta en marcha desta iniciativa por parte de ABANCA Obra Social enmárcase dentro da política de Responsabilidade Social Corporativa da entidade financeira coa que pretende mostrar o apoio e compromiso de ABANCA cos problemas da nosa contorna. Na campaña do ano pasado, ABANCA conseguiu reunir preto de 1.000 xoguetes para doar á Cruz Vermella e entregalos ás familias máis necesitadas. Ademais, 15 persoas do cadro de persoal estiveron apoiando aos máis de 50 voluntarios de Cruz Vermella na recollida e reparto de todos estes xoguetes.

O xogo, un dereito fundamental

A ‘Declaración Universal dos Dereitos da Infancia’ (20 de novembro de 1959) recoñece o xogo como un dereito fundamental, posto que xogar posibilita situacións óptimas que inflúen no crecemento e desenvolvemento da infancia.

“Queremos que todos as nenas e nenos galegos teñan este dereito e poidan xogar este Nadal, por iso, volvemos a poñer en marcha esta iniciativa coa que pretendemos superar os 1.000 xoguetes doados o ano pasado”, sinala Tatiana Suárez, directora de Responsabilidade Social Corporativa de ABANCA.

Os xoguetes que se doen teñen que ser novos xa que non hai infancia de primeira e segunda categoría. Ademais, é importante que estean embalados porque non se pode garantir que un xoguete sexa 100% seguro a partir do momento no que se sacou do seu envoltorio orixinal. Non se admitirán xoguetes sexistas nin bélicos. Ao realizar a entrega debe estar visible a embalaxe (non hai que envolver os agasallos) para poder clasificalo adecuadamente por tramos de idades.

Os xoguetes poderán entregarse do día 9 ao 17 de decembro en horario de 11.00 a 19.00 horas nos locais cedidos por ABANCA na Coruña (rúa Sol, 20), Santiago (Hórreo, 11), Lugo (Praza de Santo Domingo, 20), Pontevedra (Gagos de Mendoza 2), Vigo (Rosalía de Castro, 36) e Ourense (Avenida Santiago, 53). Unha vez finalizado o tempo de doazón de xoguetes, do 18 ao 3 de xaneiro (excepto o 24, 25, 31 e 1 de xaneiro), os locais permanecerán abertos para entregar ás nenas e nenos das familias máis necesitadas os xoguetes dispoñibles.