ABANCA colaborará coa Catedral de Santiago na conservación, restauración e difusión do seu patrimonio cultural

16-05-2018

ABANCA e a Fundación Catedral de Santiago veñen de chegar a un acordo para a realización de actuacións encamiñadas á conservación, restauración e promoción e difusión cultural da Catedral de Santiago de Compostela e as súas actividades e, en especial, do seu Museo.

O acordo, asinado esta mañá por Juan Carneiro, director territorial de ABANCA en Santiago, e por Daniel Carlos Lorenzo Santos, director da Fundación Catedral de Santiago, establece unha colaboración de 60.000 euros no tres anos de vixencia do convenio.

Coincidindo co centenario da creación da obra ‘Tríptico de Pentecostés’, do autor compostelán Juan Luís López, este primeiro ano de convenio se levarán a cabo unha serie de actuacións para a recuperación e difusión deste conxunto artístico. En primeiro lugar, realizarase a restauración da obra e, cando finalice, presentarase cunha exposición temporal e a publicación dunha monografía cun estudo das pezas e a memoria da restauración.

O ‘Tríptico de Pentecostés’ é unha obra singular dos fondos pictóricos da catedral, encargada ao pintor máis significativo de Compostela na primeira metade do século XX, Juan Luís López. Trátase dunha peza realizada en óleo sobre táboa en 1918, que foi presentada por Juan Luís, xunto a catro retratos, para a Exposición Nacional de 1920, obtendo, por esta peza, unha proposta para a Primeira medalla.

A colaboración coa Catedral de Santiago enmárcase dentro da política de Responsabilidade Social Corporativa de ABANCA coa que pretende colaborar con entidades, organismos e axentes sociais do tecido cultural e empresarial de todo o territorio galego na promoción, difusión e apoio ao coñecemento, á investigación, á cultura e á arte nas súas diferentes facetas.