ABANCA compromete 200 millóns para atraer investimentos ás áreas industriais da contorna de Vigo

25-05-2022

ABANCA activou unha liña adicional de crédito dotada con 200 millóns de euros, ampliables a 300 millóns, para atraer proxectos de investimento que reforcen a competitividade das áreas industriais de Vigo e a súa contorna. Este compromiso de crédito é a medida máis destacada do novo plan de apoio financeiro presentado polo banco esta mañá en Vigo nun encontro con representantes das principais áreas empresariais do sur de Galicia.

Este plan, que o banco presenta por quinto ano consecutivo xunto a unha oferta financeira adaptada, diríxese ás empresas das áreas empresariais de Vigo, O Porriño, Tui, Mos, Salvaterra, Gondomar e Nigrán, coas que ABANCA mantén unha liña de colaboración financeira.

O director territorial de ABANCA en Vigo, Walter Álvarez, encargouse de expoñer os eixos desta iniciativa ante os representantes destes espazos industriais, e de explicar a súa oferta financeira, detallada nos acordos de colaboración conxunta que unen ao banco con cada un destes colectivos empresariais e que se renovaron onte. En representación das áreas empresariais participaron no encontro David Regades, delegado da Zona Franca de Vigo (promotora das áreas de Balaídos, Zona comercial de Bouzas, Parque tecnolóxico e loxístico de Vigo, Porto do Molle en Nigrán e do polígono industrial A Granxa); Indalecio Cuevas e David Sobral, presidente e secretario, respectivamente, da Entidade Urbanística de Conservación A Granxa; Santiago Gomara, presidente da Asociación de Empresarios de As Gándaras-Porriño; Francisco Domínguez, xerente da Asociación de Empresarios de Mos; Giorgio Casoni, presidente da Asociación Empresarial Areas-Tui; Juan Carlos Lemos Martínez, presidente da Asociación de Propietarios e Empresarios do Polígono Chan da Ponte - Salvaterra, e José Manuel Rodríguez, xerente da Asociación de Empresarios A Pasaxe - Gondomar.

Financiamento flexible e adaptado

A liña de crédito instrumentalízase a través de produtos financeiros con condicións especiais, pensados para impulsar proxectos de investimento, apoiar a modernización das empresas e mellorar a súa competitividade, así como para atender as necesidades do crédito do día a día da súa actividade. Neste sentido, as empresas destas áreas industriais poderán acceder a financiamento flexible, con amplos prazos de amortización e posibilidade de incorporar carencias, a través de préstamos, leasing e distintas alternativas de financiamento oficial. Do mesmo xeito, terán á súa disposición produtos deseñados para dar resposta ás necesidades correntes, como pólizas de crédito, anticipos, liñas de desconto comercial ou avais, así como fórmulas para xestionar o pago a provedores ou adiantar a cobranza de facturas. Finalmente, a oferta financeira inclúe tamén solucións específicas para comercio exterior.

O encontro propiciado por ABANCA cos representantes das áreas empresariais de Vigo e a súa contorna serviu tamén para coñecer de primeira man as inquietudes deste colectivo e abordar os desafíos do contexto actual, marcado pola recuperación tras a pandemia pola COVID-19 e as tensións económicas derivadas do conflito bélico en Ucraína. Durante a súa intervención, o responsable de ABANCA en Vigo reafirmou o compromiso do banco coas empresas do sur da provincia, un dos polos máis relevantes do tecido empresarial galego, e lembrou que ten á súa disposición un plan de apoio para facilitar o acceso aos fondos europeos de recuperación Next Generation, con distintas solucións de financiamento e servizos de axuda para a tramitación as axudas.