ABANCA comprométese a manter abertas as oficinas nos 134 municipios onde é a única entidade e amplía horario de caixa para os seus clientes maiores

09-02-2022

ABANCA consultou aos grupos de interese e decidiu implantar desde mañá unha serie de medidas para facilitar que os seus clientes maiores de 65 anos poidan realizar de maneira máis cómoda e segura as súas xestións financeiras. Acordou tamén indefinidamente non pechar ningunha oficina nos 134 municipios galegos (43% do total) nos que é a única entidade con actividade.

Unha das medidas que entra en vigor mañá é a ampliación do horario de atención en caixa ata as 14.00 horas para os clientes maiores que o necesiten, un servizo que ata a data ABANCA xa prestaba os días de cobro das pensións e que agora amplía a todos os días do mes. ABANCA asignará, ademais, un xestor persoal ás persoas maiores que pola súa situación e capacidades dixitais requírano para dar resposta ás súas necesidades financeiras.

Para facilitar o contacto próximo dos clientes de máis idade coa entidade, o banco disporá de xestores tanto para o seu servizo de atención ao cliente como na súa banca telefónicaSerás redirixido a outro sitio web.

Os maiores, unha prioridade para ABANCA

A atención e o asesoramento aos clientes maiores foi e é a primeira prioridade para ABANCA, que conta con 558.147 clientes activos de máis de 65 anos, un 30% da súa base de clientes. Coas medidas que se poñen en marcha mañá, ABANCA consolida a súa vocación de ser a entidade onde os maiores poidan atopar solución ás súas necesidades financeiras.

Nestes momentos, a entidade dispón dunha ampla rede de oficinas físicas, adianta o pago de pensións ao 25 de cada mes a máis da metade dos clientes pensionistas, conta cun menú simplificado nos caixeiros automáticos das zonas rurais, desenvolve con Afundación un plan de formación aos maiores para mellorar a súa cultura financeira e favorecer a súa dixitalización e conta cunha solución global, ‘Vive a vida’, para este colectivo de produtos e servizos financeiros e non financeiros.

ABANCA conta cunha rede comercial en España de 634 oficinas, 199 delas en zonas rurais. Concretamente, en Galicia presta servizo financeiro ao 97,7% da poboación e está presente no 85% dos municipios. A rede comercial de ABANCA en Galicia permite situar á comunidade galega como a segunda Comunidade Autónoma con maior accesibilidade a servizos financeiros cun 12% dos seus municipios sen oficina fronte ao 51% de municipios que carece dela no resto de España. Como complemento da rede comercial, a entidade dispón de oficinas móbiles que dan servizo a 50.000 persoas das provincias.