ABANCA conclúe en seis meses a compra de Bankoa

28-01-2021

ABANCA incorporou a Bankoa ao seu grupo tras a finalización do proceso de compravenda da entidade vasca iniciado o pasado mes de xullo. Coa incorporación de Bankoa, ABANCA supera os 93.000 millóns de euros de volume de negocio e suma á súa rede 30 oficinas e 3 axencias de empresas, situadas maioritariamente no País Vasco.

Tras recibirse as autorizacións finais do BCE e a CNMV, a compravenda de Bankoa completouse hoxe coa firma da operación. Na firma participaron, por parte de ABANCA, o presidente e o conselleiro delegado, Juan Carlos Escotet Rodríguez e Francisco Botas, por parte de Crédit Agricole Pyrénées Gascogne, o presidente, Marc Didier, o director xeral, Paul Carite, e o CFO, Fernando Villanueva, e por parte de Crédit Agricole S.A. (CASA), Francois Rameau, Senior Country Officer Iberia.

Na mañá de hoxe tamén tivo lugar o primeiro consello de administración de Bankoa na súa nova etapa dentro do Grupo ABANCA. Como proba da confianza de ABANCA no modelo e arraigamento territorial de Bankoa, mantéñense nas súas funcións os sete conselleiros externos e independentes da entidade vasca, así como o seu conselleiro delegado, Jesús Suárez.

Crecemento e complementariedade

Coa operación, ABANCA reforza o seu posicionamento incorporando un negocio complementario coa súa estratexia, con amplas posibilidades de desenvolvemento e baseado en activos de calidade. Ademais de complementar e aumentar a súa rede na cornixa norte, a incorporación de Bankoa reforza segmentos de negocio que son prioritarios no plan estratéxico de ABANCA, como empresas e xestión de patrimonios, e achégalle potencial de crecemento en liñas como circulante, negocios, consumo e seguros.

A entidade galegaSerás redirixido a outro sitio web aumenta o seu volume de negocio en 4.267 millóns de euros (1.754 en crédito á clientela, 1.496 en depósitos e 1.017 en fondos fóra de balance) até situalo en 93.850 millóns de euros. A súa rede comercial crece con 30 oficinas (e 3 axencias de empresas), situadas fundamentalmente en Euskadi, pero tamén en Navarra, A Rioxa e Madrid, e suma máis de 40.000 novos clientes entre particulares e empresas.

A compravenda de Bankoa inclúe a firma dun acordo comercial de ámbito internacional entre ABANCA e Crédit Agricole polo que cada unha delas pasa a ser socio de referencia preferente da outra naqueles países nos que só opere unha delas.

A integración de Bankoa en ABANCA non supón ningún cambio operativo para os clientes de Bankoa, que manterán como até agora as condicións dos seus contratos. Tampouco experimenta cambios o modelo de atención que reciben por parte do equipo de Bankoa, cuxas oficinas renovarán durante o fin de semana a súa rotulación para incorporar a imaxe corporativa de ABANCA.

Próxima integración tecnolóxica

Unha vez completado o proceso de compravenda, ABANCA inicia agora o proceso de integración de Bankoa na súa plataforma tecnolóxica. Este proceso, cuxa finalización está prevista para o último trimestre deste ano, permitirá aos clientes de Bankoa beneficiarse das vantaxes completas de pertencer ao Grupo ABANCA.

Entre elas destacan unhas maiores capacidades tecnolóxicas, atención persoal nunha rede de 700 oficinas en España e 70 noutros países, acceso a 1.100 caixeiros automáticos propios, especialización en segmentos como empresas, banca privada e persoal, seguros, agro, mar, e crédito ao consumo, maior diversificación do catálogo de produtos, e presenza internacional en 11 países de Europa e América.