ABANCA condona tres meses o pago do aluguer a familias do Fondo Social de Vivenda

24-03-2020

ABANCA acordou condonar tres meses o pago do aluguer ás familias que habiten en vivendas propiedade da entidade en España acollidas ao Fondo Social de Vivenda ( FSV) e se viran afectadas por Covid-19.

ABANCA eximirá a estas familias especialmente vulnerables do pago da renda correspondente aos meses de abril, maio e xuño, para que poidan afrontar esta situación transitoria de perda de ingresos ou desemprego ocasionados pola pandemia por Coronavirus e a declaración do estado de alarma. Poderán beneficiarse da condonación aquelas familias que quedasen en situación de desemprego ou aqueles autónomos que vexan diminuídos os seus ingresos en máis dun 30% como consecuencia desta crise.

Con esta nova iniciativa ABANCA dá un paso máis respecto ao acordo adoptado a última hora de onte polo conxunto do sector bancario español, de aprazamento de ata tres meses do pago destes alugueres acollidos ao FSV.

Plan Anticipar

ABANCA ten en marcha desde o pasado día 14 o ‘Plan Anticipar’, que inclúe un paquete de medidas extraordinarias para acompañar e axudar ás familias e empresas a paliar os efectos económicos derivados desta crise sanitaria mediante respostas anticipadas de financiamento ou xestión operativa. Como primeiras accións, a entidade mobilizou 8.300 millóns de euros para atender as necesidades de liquidez de empresas, pemes e autónomos, e adiantou o pago de pensións desde hoxe aos preto de 400.000 clientes que teñen domiciliado este ingreso no banco. Á medida aprobada hoxe de condonación de alugueres a familias vulnerables sumaranse en próximos días outras iniciativas de apoio aos colectivos máis afectados por esta pandemia.