ABANCA controlará o 100% de CXG Aviva e recupera a libre comercialización de seguros na súa rede

  • A Corte de Arbitraxe da Cámara Oficial de Comercio e Industria de Madrid fixa un prezo de 267 millóns, fronte aos 430 reclamados por Aviva

ABANCA xestionará de maneira directa o 100% do seu negocio de comercialización de seguros de vida e pensións de CXG Aviva, en virtude do laudo emitido hoxe pola Corte de Arbitraxe da Cámara Oficial de Comercio e Industria de Madrid.

De acordo co establecido neste laudo, que afecta as oficinas que comercializaban en exclusiva produtos de Aviva,  ABANCA adquirirá a Aviva o 50% que esta mantiña na joint-venture CXG Aviva, na que ambas, banco e aseguradora, eran socios. A Corte de Arbitraxe fixou para a compra dese paquete accionarial un prezo de 267 millóns, fronte aos 430 reclamados por Aviva.

A operación permite a ABANCA dispor, por un custo vantaxoso con respecto ao prezo de mercado, dunha compañía líder en Galicia e que engloba baixo una mesma estrutura produto, estratexia e servizo.

Comercialización e distribución

Aviva e ABANCA mantiñan desde 2001 diversos acordos para o desenvolvemento, comercialización e distribución de seguros persoais e plans de pensións a través da rede de Caixa Galicia. Esta alianza incluíu a adquisición por Aviva do 50% do capital de CXG Aviva.

A Corte de Arbitraxe da Cámara Oficial de Comercio e Industria de Madrid viña desenvolvendo desde 2012 un proceso encamiñado a resolver a reclamación exposta por Aviva en relación coa integración das caixas galegas e a posterior entrada do FROB no capital da entidade resultante.

“A decisión da Corte de Arbitraxe proporciónanos o control directo para integrar baixo o novo modelo de xestión de ABANCA a comercialización de pólizas de vida e pensións, un segmento clave no noso negocio de bancaseguros”, asegura Luís Beraza, director xeneral de Negocio España de ABANCA.

Bancaseguros ABANCA

A través da súa actividade de bancaseguros, ABANCA está presente nos segmentos de seguros de vida e pensións, non-vida, e grandes empresas e administracións.

En cada un deles ABANCA comercializa un amplo catálogo de produtos das compañías líderes que permite ao cliente elixir a opción que mellor se adapte ás súas necesidades específicas.

ABANCA presta servizos de asesoramento e comercialización de seguros para 425.000 clientes, tanto particulares como empresas. O número total de pólizas comercializadas por ABANCA ascende a 680.000 cun importe total de primas de 850 millóns de euros. No segmento de plans de pensións ABANCA xestiona un patrimonio de 887 millóns.