ABANCA convértese no primeiro accionista de Nueva Pescanova co 30,81% do capital
- A entidade financeira incrementa a súa participación con tres novas compras de accións da pesqueira
- Mediante o seu apoio a Nueva Pescanova, ABANCA contribúe a reforzar o complexo industrial galego relacionado co mar
Descarga en alta resolución Serás redirixido a outro sitio web e abrirase nunha nova ventá
ABANCA converteuse no principal accionista de Nueva Pescanova tras pechar recentemente tres operacións a través das cales adquiriu tres paquetes de títulos equivalentes a un 13,60% do capital de Nueva Pescanova. Concretamente adquiriu un 7,66% pertencente ao fondo Oceanwood, un 0,03% de MUFG Bank e un 5,91% que posuía BBVA. Con estas compras, ABANCA eleva a súa participación na empresa pesqueira ata o 30,81% e multiplica por cinco a participación que tiña ao comezo de 2018.
O incremento da participación de ABANCA en Nueva Pescanova durante este ano enmárcase na súa política xeral de apoio á economía e a industria galegas, que está orientado á consolidación e crecemento de empresas e sectores claves.
Mediante o seu apoio a Nueva Pescanova, ABANCA contribúe a reforzar o complexo industrial relacionado co mar, no que Galicia é unha das comunidades punteiras a nivel internacional. ABANCA destina a este conxunto de sectores (pesca, conserva e transformación, construción naval, etc.) un investimento crediticio total de 1.373 millóns de euros.