ABANCA convida a Galicia ao Premio Nobel da Paz 2014, Kailash Satyarthi

21-04-2015

Kailash Satyarthi, Premio Nobel de la Paz 2014, realizará unha visita institucional a Galicia os días 7 e 8 de maio para participar en varias actividades organizadas por ABANCA. A iniciativa enmárcase dentro do seu compromiso estratéxico co fomento do emprendemento e coa súa contribución na creación dun futuro para a mocidade galega.

Coa presenza do Nobel da Paz búscase promover o debate na sociedade galega, o sector privado e o terceiro sector, sobre o papel da educación no futuro dos mozos e a importancia dos principios éticos para lograr unha sociedade máis responsable e xusta.

O momento central da súa visita terá lugar na tarde do 7 de maio, no Palacio de Congresos da Coruña, onde o Nobel da Paz pronunciará unha conferencia aberta ao público e de carácter gratuíto. Durante o seu relatorio desenvolverá diferentes aspectos como a importancia de escoitar e apoiar aos nenos e mozos galegos xa que serán os líderes do mañá, a súa experiencia vital contra a utilización de nenas e nenos para traballos que non lles corresponden, e a necesidade de avanzar na construción dunha sociedade máis responsable.

O aforamento para a conferencia é limitado e será necesario confirmar asistencia a través do teléfono do servizo de venda de entradas Ataquilla (981 900 561) e recoller posteriormente a entrada en calquera oficina de ABANCA ou nos despachos de billetes de Afundación.

Durante a súa estancia en Galicia, Kailash Satyarthi terá oportunidade de escoitar a representantes sociais, políticos e empresarios e de coñecer a situación das oportunidades de formación e laborais da mocidade galega.

Encontro con máis de 350 mozos en Santiago de Compostela

A súa estancia en Galicia terminará no IES Rosalía de Castro de Santiago de Compostela. Alí, máis de 300 mozos participarán nun encontro co Premio Nobel no que poderán realizarlle preguntas sobre a súa experiencia na loita pola defensa dos nenos e mozos no seu país de orixe ou sobre papel da educación na sociedade, entre outras moitas cuestións. Neste sentido, Kailash Satyarthi é todo un exemplo xa que dedicou a súa vida a loitar polo desenvolvemento da ética nos negocios e o impulso de medidas de protección do traballo infantil.

Acerca de Kailash Satyarthi

Kailash Satyarthi é o fundador da organización social Bachpan Bachao Andolan. Defensor dos dereitos humanos, iniciou en 1980 unha cruzada contra o traballo e o analfabetismo infantil. Como activista liderou o rescate de máis de 80.000 nenos en graves condicións de abandono e abuso laboral, e desenvolveu un modelo de éxito para a súa educación e rehabilitación social.

En 1998, Kailash Satyarthi organizou ‘A Marcha Mundial contra o Traballo Infantil’ coa que percorreu 103 países e mobilizou os esforzos internacionais para protexer e promover os dereitos de todos os nenos, especialmente o dereito a recibir unha educación gratuíta. Desde entón foi recoñecido internacionalmente pola inclusión do traballo infantil na axenda social e política global. O ano pasado foi recoñecido co Premio Nobel da Paz, galardón que compartiu con Malala Yousefzai.