ABANCA doa un millón de euros ás vítimas da DANA

  • O obxectivo é axudar ás numerosas persoas que atravesan unha situación crítica e que necesitan a colaboración de todos para paliar os efectos da catástrofe
  • A doazón será distribuída entre Cruz Vermella Española e Cáritas Española

Descarga en alta resolución Serás redirixido a outro sitio web e abrirase nunha nova ventá

ABANCA realizou unha doazón dun millón de euros para as vítimas da DANA que arrasou a Comunidade Valenciana. O obxectivo é axudar ás numerosas persoas que atravesan unha situación crítica e que necesitan a colaboración de todos para paliar os efectos da catástrofe. A doazón será distribuída entre Cruz Vermella Española e Cáritas Española.

ABANCA activou ademais unha conta solidaria para todas aquelas persoas ou entidades que queiran facer donativos: ES80 2080 7208 3385 3000 7122.

A doazón económica realizada hoxe únese ao resto de medidas adoptadas desde o primeiro momento, como a prioridade na atención dos sinistros, unha liña de financiamento con condicións preferentes e un labor de apoio sobre o terreo a clientes, empresas e persoas damnificadas para ofrecerlles a axuda que necesiten.

Desde ABANCA Seguros continúase dando prioridade aos sinistros ocasionados polos danos causados e habilitouse unha liña de atención telefónica 900 815140 para que todas as persoas poidan ser atendidas o máis axiña posible.

Ademais, a entidade financeira ten activa unha liña de financiamento de ata 150 millóns para atender a clientes e empresas polos danos ocasionados, especialmente no sector agro, da Comunidade Valenciana, Murcia e Andalucía oriental.

ABANCA ten outra liña de axuda aberta, a través do programa solidario «Cultura por alimentos» da súa Obra Social. Trátase dunha liña de doazón mentres resulte necesario de toda a recadación en produtos non perecedoiros aos bancos de alimentos das zonas prexudicadas e para quen se atope en situación de maior vulnerabilidade. Con esta vocación solidaria, Afundación animou a todas as persoas a participar neste chamamento e achegarse a calquera das súas sedes, onde poderán depositar os alimentos non perecedoiros nos contedores habilitados para o efecto.

ABANCA quere trasladar a súa solidariedade coas vítimas e mostrar o seu apoio e recoñecemento aos servizos de emerxencia e voluntarios. A entidade seguirá atenta ás necesidades a curto e medio prazo que vaian detectando os equipos da zona para contribuír a paliar os efectos devastadores desta DANA.