ABANCA e a Cámara de Comercio de A Coruña colaboran para reforzar o emprendemento e o apoio a empresas e autónomos

ABANCA e a Cámara de Comercio de A Coruña asinaron un acordo de colaboración en conxunto co obxectivo de reforzar a competitividade empresarial e o emprendemento de empresas e autónomos en 2024.

O acordo foi firmado polo director de negocio institucional de ABANCA en Galicia, España norte e Portugal, Lino Comesaña, e polo presidente da Cámara, Antonio Couceiro. Durante o acto de firma, ambos representantes conversaron sobre os retos actuais aos que se enfrontan tanto empresas e autónomos xa consolidados, como emprendedores e puxeron en valor a importancia da dinamización do tecido empresarial coruñés.

O convenio recolle unha serie de actividades que se enmarcan no “Programa de accións de mellora da competitividade empresarial e de apoio a emprendedores 2024”, e que se estruturan en tres eixes principais: accións orientadas a facilitar a inserción laboral, programas de apoio a emprendedores e accións encamiñadas á mellora da competitividade empresarial. As actividades formativas levaranse a cabo en modalidade presencial, en streaming con modelo de aula virtual e online.

Durante a firma, Lino Comesaña reafirmou “o compromiso da entidade financeira coas necesidades das empresas e co mundo do emprendemento a través dun acordo que busca impulsar e dinamizar o tecido empresarial da Coruña e da súa área de influencia”. Pola súa parte, Antonio Couceiro sinalou: “Coa continuidade desta colaboración mantemos o noso compromiso co impulso ao emprendemento e co desenvolvemento económico e empresarial da Coruña”.