ABANCA e a D. O. Ribeira Sacra facilitan o financiamento no arranque da vendima
- O banco facilitará cunha póliza de crédito o cumprimento da Lei 12/2013, que esixe o pago da uva en menos de 30 días
- Con esta rúbrica, ABANCA suma á súa oferta ao sector vitivinícola a unha nova denominación de orixe, despois de firmar nas últimas semanas con Rías Baixas e Monterrei
ABANCA e o Consello Regulador da Denominación de Orixe Ribeira Sacra impulsaron hoxe o seu traballo conxunto coa firma dun convenio financeiro. Grazas a este texto, as adegas e os agricultores accederán á oferta económica para o sector vitivinícola lanzada polo banco con sede en Galicia.
Na firma, que tivo lugar na sede da denominación de orixe en Monforte, participaron o director de Banca Agro e Mar de ABANCA, Jesús Combarro Pereira, e o presidente do Consello Regulador da Denominación de Orixe Ribeira Sacra, José Manuel Rodríguez González.
Cumprimento da lei
Un dos produtos máis destacados do acordo presentado por ABANCA e D.O. Ribeira Sacra é unha póliza de crédito cun prazo de ata cinco anos que permite compensar as demandas da Lei 12/2013 en materia de cadea alimentaria. Esta regulación esixe pagos nun prazo máximo de 30 días para importes maiores a 2.500 euros e con este produto as adegas poden facer fronte ao pago da uva aos viticultores dunha maneira flexible. A entrada en vigor desta lei está supoñendo un reto financeiro para moitas adegas.
A oferta aos viticultores tamén contempla outros produtos de financiamento especificamente pensados para este colectivo. Entre eles, dáse resposta ás necesidades de crédito que algunhas adegas teñen para impulsar as súas exportacións. Estas operacións, que rexistraron importantes incrementos nas últimas campañas, contribúen a proxectar e consolidar a imaxe internacional da denominación.
Alternativas de crédito
O documento asinado entre as dúas entidades tamén ofrece opcións de financiamento para os pequenos propietarios de viñedos. Dun xeito áxil, aténdese aos produtores de uva que poden acceder a un financiamento adaptado ás súas necesidade. Así, o banco con sede en Galicia pon á súa disposición anticipos de subvencións sen comisións, confirming sobre pagarés de adegas ou financiamento oficial do ICO ou Igape. Os agricultores tamén contarán con asesoramento en materia de seguros, cunha oferta personalizada.
A posta en marcha destas iniciativas de maneira conxunta entre a D.O. Ribeira Sacra e ABANCA se circunscribe no decisivo apoio que a entidade financeira presta ao sector vitivinícola no inicio da campaña. Desta maneira, ofrécese a adegas e viticultores un financiamento flexible e competitivo que responde ás necesidades de crédito. Con esta firma, ABANCA suma á súa oferta ao sector vitivinícola a unha nova denominación de orixe, despois de firmar nas últimas semanas con Rías Baixas e Monterrei.