ABANCA e a Deputación de Lugo renovan o convenio para facilitar a xestión tributaria aos veciños de 64 municipios da provincia
- Grazas ao acordo os veciños e veciñas dos concellos adheridos ao servizo provincial de Recadación poden pagar recibos e taxas a través da rede de servizos bancarios e oficinas da entidade bancaria
- ABANCA reforza con este acordo seu compromiso co Lugo ao pór á disposición da veciñanza todas as súas capacidades comerciais e canles dixitais para que poidan cumprir coas súas obrigas tributarias en calquera momento e desde calquera lugar
Santiago Novoa (dereita) e José Tomé, tras a firma do acordo.
O director de Banca Institucional de ABANCA, Santiago Novoa García, asinou este venres co presidente da Deputación de Lugo, José Tomé Roca, e a deputada de Economía, Recadación, Facenda e Especial de Contas, Mayra García Bermúdez, un convenio de colaboración entre as dúas entidades. A renovación do acordo permite que os veciños e veciñas dos 64 concellos da provincia que están adheridos ao Servizo de Xestión Tributaria e Recadación poidan pagar recibos e taxas a través da rede de servizos bancarios e oficinas da entidade bancaria.
Santiago Novoa trasladou a satisfacción da entidade financeira “por poder axudar aos veciños con estes trámites, facilitando a súa xestión de xeito sinxelo, flexible e cómodo, ao poñer á súa disposición todas as nosas capacidades comerciais e canles dixitais para que poidan cumprir coas súas obrigas tributarias locais en calquera momento e desde calquera lugar”. “A renovación deste acordo é un exemplo máis do compromiso de ABANCA coa provincia de Lugo e da estreita liña de colaboración que mantemos coa Deputación Provincial, con distintas iniciativas conxuntas en marcha, entre as que destaca o Plan Reactivación Lugo”, salientou o director de Banca Institucional de ABANCA.
Pola súa banca, o presidente da Deputación luguesa subliñou que “este convenio xurde do convencemento de que as entidades privadas e as administracións públicas temos que colaborar, dende os nosos respectivos ámbitos, para facilitarlle a vida á cidadanía. Isto, que é unha obriga sempre, resulta aínda máis necesario nestes últimos meses, nos que as medidas de loita contra a pandemia impuxeron cambios e restricións no ritmo da nosa vida diaria”.
“Pagar impostos, contribuír entre todos e todas ó sustento do que é de todos, é unha característica das democracias. Porque dese pago que facemos xorden os fondos para soster os servizos públicos que precisamos. Convén que o lembremos tamén nos momentos de situación económica complicada, e penso que este convenio, ó facilitar e simplificar o proceso, axúdanos a ter presente a súa importancia”, sinalou o presidente.
ABANCA colaborará a través da súa rede de sucursais, caixeiros automáticos, banca electrónica e móbil ou outras canles na recadación dos impostos dos concellos da provincia que teñen delegado esta tramitación na institución provincial. O convenio presta especial atención, non só á comodidade e a facilidade para o usuario, senón tamén cara a súa seguridade dixital, para garantir que os seus datos son tratados coa confidencialidade e a profesionalidade axeitada.