ABANCA e a Deputación de Pontevedra inxectarán un 20% máis de crédito na provincia
- Ámbalas entidades renovan o acordo que permitirá destinar 87 millóns de euros a financiar en condicións vantaxosas iniciativas orientadas ao desenvolvemento económico e social
- Ata o momento, Deputación e ABANCA apoiaron con 71 millóns de euros en crédito a case 3.000 pemes, autónomos e familias de Pontevedra a través do Plan Activamos
Carmela Silva, presidenta da Deputación de Pontevedra, e Santiago Novoa, director de Banca Institucional de ABANCA, durante a presentación da renovación do acordo
Descarga en alta resolución Serás redirixido a outro sitio web e abrirase nunha nova ventá
Carmela Silva, presidenta da Deputación de Pontevedra, e Santiago Novoa, director de Banca Institucional de ABANCA, asinan a renovación do Plan Activamos
Descarga en alta resolución Serás redirixido a outro sitio web e abrirase nunha nova ventá
ABANCA e a Deputación de Pontevedra renovaron esta mañá o Plan Activamos, unha iniciativa conxunta a través da cal a entidade financeira destinará 87 millóns de euros en crédito a familias, pemes, autónomos e corporaciones locais co obxectivo de impulsar o desenvolvemento económico e social da provincia.
A presidenta da Deputación de Pontevedra, Carmela Silva, e o director de Banca Institucional de ABANCA, Santiago Novoa García, foron os encargados de asinar a renovación do plan, cun importe de financiamento superior nun 20% ao formalizado no marco do primeiro convenio de colaboración entre ámbalas entidades, subscrito en xullo de 2014.
A liña de crédito conta cunhas condicións financeiras moi vantaxosas: tipos de xuros por debaixo do mercado –os precios baixaron con respecto ao primeiro protocolo- e sen bandas de flutuación; cero comisións de apertura, estudo, amortización ou cancelación anticipada; amplos prazos de amortización, e posibilidade de carencia naquelas modalidades nas que o cliente necesita un prazo para situarse en condicións de xerar ingresos.
Proxectos financiables
O Plan Activamos financia a pemes e autónomos na posta en marcha de proxectos emprendedores, desenvolvemento de novos investimentos, creación de emprego, actuacións de mellora enerxética nos seus negocios e tamén cobre necesidades de circulante. Para as familias, ABANCA oferta a través deste programa de financiamento préstamos para a dotación de equipamento tecnolóxico, realización de actividades de formación, reformas no fogar que contribúan á mellora da accesibilidade ou á eficiencia enerxética, e adquisición de vehículos eficientes. Finalmente, as corporacións locais poden optar no marco deste programa a préstamos para acometer pequenos investimentos municipais ou para cubrir necesidades de tesourería.
Balance do primeiro Plan Activamos
No marco do Plan Activamos, ABANCA formalizou ata o momento 2.964 operacións de financiamento na provincia de Pontevedra, cun importe global de 71 millóns de euros. Pemes, micropemes, comerciantes e autónomos foron os principais beneficiarios do programa, ao concentraren o 94% das operacións e o 96% do financiamento concedido na provincia. Os créditos destináronse maioritariamente a financiar novos investimentos empresariais e, en menor medida, a atender necesidades de liquidez. O importe medio do financiamento a estes colectivos empresariais foi de 24.600 euros.
Preto de 200 familias aproveitaron tamén as boas condicións deste programa de créditos, principalmente para financiar obras de mellora enerxética no fogar e actividades de formación. En total, ABANCA tramitou xa a través do Plan Activamos préstamos a familias por un volume global de 1,85 millóns de euros en Pontevedra. O importe medio dos préstamos foi de 9.900 euros.