ABANCA e Afundación colaborarán coa Asociación Galega da Empresa Familiar en actividades asociativas e formativas
- As tres entidades subscriben acordos dirixidos a apoiar o tecido empresarial familiar, divulgar a importancia do seu papel social e económico, e fomentar o emprendemento
De esquerda a dereita na imaxe, o conselleiro delegado de ABANCA, Francisco Botas, o presidente de AGEF, Víctor Nogueira, o presidente de ABANCA, Juan Carlos Escotet Rodríguez, e o presidente de Afundación, Miguel Ángel Escotet.
ABANCA e Afundación subscribiron senllos acordos de colaboración coa Asociación Galega da Empresa Familiar (AGEF) para apoiar o desenvolvemento das actividades desta ao longo dos próximos doce meses.
O apoio de ABANCA á Asociación Galega da Empresa Familiar ten por obxectivo contribuír ao fortalecemento do tecido empresarial familiar galego, clave na economía da comunidade autónoma e unha das prioridades da actividade financeira do banco con sede en Galicia.
O convenio con Afundación vai dirixido a pór en marcha o programa educativo ‘Empresa familiar nas aulas’. Esta iniciativa, dirixida a estudantes e profesores galegos de 6º de Educación Primaria e 4º de Educación Secundaria Obrigatoria, dará a coñecer a relevancia económica e social da empresa familiar e promoverá as vocacións emprendedoras.
Os acordos foron subscritos por parte de ABANCA polo seu conselleiro delegado, Francisco Botas, por parte de AGEF polo seu presidente, Víctor Nogueira, e por parte de Afundación polo seu presidente, Miguel Ángel Escotet. O acto de firma, que tivo lugar na sede corporativa de ABANCA na Coruña, contou tamén coa presenza do presidente de ABANCA, Juan Carlos Escotet Rodríguez.