ABANCA e Afundación inician unha campaña solidaria de apoio aos cidadáns e refuxiados de Ucraína
- A Obra Social ABANCA pon ao dispor das asociacións culturais, colectivos sociais e clubs deportivos galegos o correo ayudaparaucrania@afundacion.org para canalizar a axuda
- Habilitaranse puntos de recollida de produtos de primeira necesidade nas sedes e centros de Afundación en toda Galicia
- O banco e a súa Obra Social habilitan unha conta solidaria propia para recadar fondos
Descarga en alta resolución Serás redirixido a outro sitio web e abrirase nunha nova ventá
ABANCA e Afundación veñen de pór en marcha unha campaña solidaria de apoio a Ucraína que ten como obxectivo contribuír a paliar a crise humanitaria provocada pola agresión militar que está a sufrir o país.
“A Obra Social do banco - subliña o presidente de Afundación, Miguel Ángel Escotet- ponse ao dispor de todas as asociacións culturais, colectivos sociais e clubs deportivos galegos que así o desexen para canalizar as iniciativas de axuda ao pobo ucraíno que poidan xurdir”. Os interesados poden escribir ao correo electrónico ayudaparaucrania@afundacion.org.
Como unha das primeiras medidas, ABANCA e Afundación habilitaron unha conta solidaria propia co fin de recadar fondos para atender as necesidades máis urxentes da poboación afectada polo conflito. As doazóns irán destinadas a Cruz Vermella e Save the children. As persoas que desexen colaborar poderán realizar un donativo sen ningún tipo de comisión na conta ES80 2080 7208 3385 3000 7122. Tamén serán gratuítas todas as transferencias que se realicen a Ucraína desde as contas de ABANCA.
Outra decisión adoptada é abrir todas as sedes e centros de Afundación para a recollida de produtos de primeira necesidade, destinados ás persoas damnificadas pola guerra. Deste xeito, toda a infraestrutura do proxecto solidario ‘Cultura por alimentos’ utilizarase temporalmente durante o período que dure esta situación para recoller as doazóns destinadas á zona do conflito e aos puntos fronteirizos que están a recibir o maior número de refuxiados.
Seguindo as recomendacións das entidades que están a traballar sobre o terreo solicítanse prioritariamente alimentos precociñados e latas de conserva, alimentos infantís, produtos hixiénico-sanitarios infantís e femininos e medicamentos e material de primeiros auxilios.
Durante os meses de xullo e agosto, Afundación poñerá ao dispor de nenos e nenas ucraínos que o necesiten as instalacións da súa residencia de estudantes de Pontevedra, que conta con 140 prazas. Ademais, os auditorios e teatros de Afundación acollerán eventos solidarios co obxectivo de recadar fondos destinados a esta campaña solidaria con Ucraína.