ABANCA e Afundación inician unha campaña solidaria do Nadal para reunir xoguetes e fondos para os damnificados pola DINA
- O banco e a súa Obra Social reforzan así as accións postas en marcha para contribuír a paliar as necesidades das persoas afectadas polas riadas en Valencia
- Calquera persoa poderá realizar a súa achega a esta iniciativa a través da web dibujarsonrisas.abanca.com ata o 30 de decembro
Descarga en alta resolución Serás redirixido a outro sitio web e abrirase nunha nova ventá
ABANCA e Afundación veñen de pór en marcha unha nova edición da súa tradicional campaña solidaria do Nadal, que este ano terá como fin reunir xoguetes e fondos para enviar a Valencia. O obxectivo é que as familias damnificadas pola DANA do 29 de outubro, especialmente os máis pequenos, poidan manter algunha das tradicións do Nadal máis arraigadas a pesar da situación crítica que están a vivir e tamén contribuír a que a cidadanía valenciana poida dispoñer dos recursos económicos necesarios para seguir reconstruíndo as zonas devastadas polas riadas.
As persoas que queiran colaborar con esta causa solidaria poderán realizar a súa achega económica a través da web dibujarsonrisas.abanca.com. Esta canle estará aberta ata o 30 de decembro.
Tamén é posible realizar donativos mediante transferencia á conta solidaria habilitada por ABANCA ES80 2080 7208 3385 3000 7122.
Unha parte das doazóns recibidas destinaranse á adquisición de xoguetes e o resto dos fondos entregaranse a Cáritas e Cruz Vermella, dúas organizacións que traballan sobre o terreo e coas que o banco colabora desde o primeiro momento.
Apoio a Valencia
ABANCA e Afundación implicáronse coas persoas damnificadas pola DANA desde que ocorreu esta catástrofe natural. O banco realizou unha doazón dun millón de euros que foron distribuídos entre Cruz Vermella e Cáritas, deuse prioridade aos afectados na atención dos sinistros, púxose en marcha unha liña de financiamento con condicións preferentes e estase realizando desde os primeiros días un labor de apoio directo a clientes, empresas e cidadáns para ofrecerlles a axuda que necesiten.
Ademais, ABANCA habilitou unha conta solidaria para recadar fondos. Parte do diñeiro doado a través desta canle foi destinado a Cáritas e Cruz Vermella, e outra parte entregouse ao Centro Ocupacional La Torre, unha asociación situada en Valencia que atende a uns 80 usuarios con discapacidades graves e cuxas instalacións quedaron totalmente destruídas despois da riada.
Outra liña de axuda aberta é a impulsada pola Obra Social do banco, Afundación, a través do seu programa ‘Cultura por alimentos’. A colaboración da cidadanía con esta iniciativa permitiu canalizar durante este primeiro mes máis de 57 toneladas de axuda ás persoas máis vulnerables.