ABANCA e Altradime asinan un acordo para facilitar o acceso ao crédito aos transportistas leoneses
- O banco deseña unha oferta financeira adaptada ás necesidades dos máis de 200 transportistas asociados, con múltiples opcións de crédito, produtos propios e convenios con diversos organismos públicos
O presidente de Altradime, Pablo Lorenzo, e o director territorial de ABANCA en Castela e León, Asturias e Cantabria, Marcos Lamas, durante a firma do acordo.
ABANCA e a Asociación Leonesa de Empresarios do Transporte (Altradime) asinaron esta mañá un convenio de colaboración mediante o cal o banco ofrecerá un amplo abanico de produtos e servizos financeiros, ademais de asesoramento, aos máis de 200 transportistas asociados.
O acordo, rubricado polo director territorial de ABANCA en Castela e León, Asturias e Cantabria, Marcos Lamas, e o presidente de Altradime, Pablo Lorenzo, eríxese como un respaldo sólido para fortalecer a actividade económica dos empresarios do transporte na provincia de León, e pon o foco especialmente en fórmulas áxiles de financiamento.
Apoio ás necesidades dos transportistas
A oferta de ABANCA inclúe préstamos persoais ou pólizas de crédito con intereses moi atractivos, dous produtos idóneos para facer fronte ás tensións de tesourería que se poden producir no desempeño desta actividade económica. Ademais, o convenio céntrase igualmente en solucións de leasing para financiar novos vehículos, contribuíndo así ao crecemento e modernización da frota de transportes.
Os profesionais asociados tamén dispoñerán doutros produtos habituais, como desconto comercial ou avais, e poderán beneficiarse das liñas de financiamento que ABANCA ten subscritas con diversos organismos públicos como o ICO, ademais dos convenios que a entidade mantén con diferentes SGR no territorio nacional.
Co ánimo de ofrecer unha atención máis personalizada, ABANCA ofrecerá a este colectivo asesoramento especializado para seleccionar as mellores opcións de financiamento para as súas necesidades e proxectos de investimento. Tamén poñerá a disposición dos transportistas persoal especializado en xestión de seguros, que asesorarán das pólizas que mellor se adapten ás necesidades de cada asociado.
"Este acordo reflicte o noso compromiso co tecido empresarial local e a nosa disposición para ser un aliado estratéxico para o crecemento sostible dos sectores clave na provincia leonesa", destacou o director territorial de ABANCA durante a firma. Pola súa banda, o presidente de Altradime, puxo en relevo a importancia de contar cun socio financeiro como ABANCA, “que é capaz de comprender as necesidades específicas dun sector tan complexo como o noso”.
Altradime é unha asociación fundada en 1977 co obxectivo principal de unir aos empresarios do transporte en León. Na actualidade conta con máis de 200 socios e unha frota de preto de 1.000 camións. ABANCA, pola súa banda, é a entidade financeira de referencia no noroeste español, cunha ampla rede de oficinas e unha clara orientación cara ao tecido empresarial.