ABANCA e ASAJA Castela e León renovan a súa colaboración enfocados na sostibilidade e na campaña da PAC 2024
- O banco e a organización agraria continúan traballando man a man para facer fronte aos desafíos do sector
- A entidade financeira facilita a tramitación das axudas da PAC en plena recta final de solicitudes
- Ambas as entidades outorgan especial importancia á sostibilidade a través da renovación e modernización da maquinaria e os cultivos
O presidente de ASAJA Castela e León, Donaciano Dujo Caminero, e o coordinador de ABANCA Agro en Castela e León, Alfonso García Marcos, durante a firma do acordo.
ABANCA e ASAJA Castela e León renovan, un ano máis, o acordo de colaboración que manteñen. O convenio sitúa o foco principal na tramitación das axudas da PAC 2024, que se atopa na recta final do prazo de solicitudes, e reforza o compromiso que a entidade financeira mantén co sector agrario da rexión.
O coordinador de ABANCA Agro en Castela e León, Alfonso García Marcos, foi o encargado de asinar o acordo en Valladolid co presidente de ASAJA Castela e León, Donaciano Dujo Caminero. Nel reflíctese, unha vez máis, o compromiso de ABANCA co sector primario e recóllense unha serie de fórmulas de crédito creadas especificamente para os agricultores e gandeiros que forman parte desta organización agraria, e que sitúan a sostibilidade no epicentro do acordo. A posta en marcha de novos proxectos e a mellora da competitividade dos actuais son outros dos aspectos esenciais da colaboración e reflíctense a través de produtos e servizos específicos.
Así mesmo, ABANCA ofrece unha serie de préstamos persoais con amplos prazos de amortización, posibilidade de carencias e xuros moi competitivos. No acordo especifícanse tamén unha serie de liñas para potenciar o desenvolvemento de actividades sostibles, solucións como o leasing mobiliario e diferentes alternativas de financiamento dos convenios co ICO, SGR nacionais, o Instrumento Financeiro de Xestión Centralizada do MAPA e SAECA.
Tramitación da PAC e Liña de Financiamento Agro Multidestino
Co prazo de solicitude da PAC 2024 na súa recta final, o convenio de colaboración recolle o acordo entre ABANCA e a organización agraria para a tramitación e facilitación da domiciliación dos pagos, así como a oferta de alternativas de crédito para o seu anticipo aos agricultores e gandeiros. Este anticipo permitirá optar ata ao 90% do importe da axuda de forma rápida. Co obxectivo de axilizar a tramitación destes anticipos, o banco simplificou os trámites para facilitar o acceso ás principais liñas de financiamento de circulante por importe de ata 100.000 euros.
A oferta complétase co acceso á Liña de Financiamento Agro Multidestino de ABANCA. Trátase dun produto deseñado para dar resposta ás necesidades e demandas do sector a través do que poderán unificar nun único contrato o financiamento do día a día das súas explotacións agrarias. É dicir, agrupa o anticipo das axudas da PAC, o acceso a fondos para facer fronte aos gastos das campañas agrícolas e gandeiras e o financiamento das primas de seguros agrarios contratados en ABANCA, co consecuente aforro que supón nos custos e a simplificación dos trámites administrativos. Así, as persoas asociadas dispoñen dos fondos en función das necesidades puntuais que xurdan ao longo do ano.
A firma deste acordo únese a outros rubricados, tanto este ano como en anteriores, e ratifica o compromiso que mantén ABANCA coa economía da comunidade, en especial co sector primario, esencial para a zona.