ABANCA e Microsoft activan o desenvolvemento de blockchain en Galicia
- Con esta tecnoloxía, a entidade financeira continúa avanzando na súa transformación dixital
- O banco e a tecnolóxica compartirán tres xornadas de traballo e análise sobre blockchain
- O obxectivo de ABANCA é que Galicia sexa líder no uso e aplicación de blockchain
Ponentes e público asistente a unha das actividades organizadas por ABANCA e Microsoft.
Representantes de Microsoft e ABANCA na presentación das xornadas.
ABANCA e Microsoft analizan esta semana en Galicia o presente de blockchain, a tecnoloxía que está a cambiar as transaccións dixitais ao permitir o intercambio de calquera activo dixital de forma segura optimizando procesos, eliminando intermediarios, aforrando custos e reducindo posibles fraudes.
Ademais do evento externo ‘Revelando o potencial de blockchain’, no que participarán as empresas máis relevantes de Galicia, ABANCA e Microsoft liderarán un evento de hackaton e dúas xornadas internas de traballo para explorar a potencialidade da tecnoloxía blockchain no día a día do banco.
Co uso de blockchain, ABANCA continúa avanzando na súa transformación dixital. “Un dos alicerces fundamentais da estratexia dixital de ABANCA é ofrecer aos nosos clientes a tecnoloxía financeira máis innovadora, tentando incorporar as últimas novidades e tendencias do mercado. Por iso queremos desenvolver todas as posibilidades que ten o mecanismo blockchain na actividade financeira”, sinala o director xeral de TI do banco, José Manuel Valiño.
Microsoft, socio estratéxico clave para habilitar blockchain como servizo
Microsoft e ABANCA presentan en Galicia o desenvolvemento da tecnologia blockchain nun momento no que a transformación dixital é a clave da competitividade empresarial. Neste contexto, a adopción de novos procesos é imprescindible para responder as necesidades do mercado e dos consumidores.
O obxectivo de ABANCA é axudar a que a comunidade galega sexa líder no uso e aplicación desta tecnoloxía. Galicia é, segundo Microsoft, unha das comunidades máis punteiras no ámbito tecnolóxico. A compañía colabora activamente con máis de 250 partners tecnolóxicos en Galicia; trátase de compañías que desenvolven software e proporcionan servizos de consultoría baseados na tecnoloxía de Microsoft ás empresas galegas.
A misión de Microsoft como socio tecnolóxico estratéxico é proporcionar valor diferencial mediante a entrega de solucións que dan resposta ás necesidades do día a día das organizacións. Como explica Pablo Junco, especialista en tecnoloxía blockchain de Microsoft Corporation: “O noso obxectivo é axudar a transformar a maneira en que se fan os negocios hoxe. Con blockchain podemos facilitar esa axilidade cun sistema máis aberto, transparente e verificable publicamente, que cambia de forma radical a maneira na que pensamos sobre o intercambio de valores e activos e sobre como facer cumprir contratos e compartir datos entre as industrias, cumprindo todas as regulacións en materia de seguridade, privacidade e transparencia”. O directivo de Microsoft engadiu: “Cremos firmemente que con blockchain sobre Azure abriremos novas oportunidades de ingresos para as empresas. A desintermediación está a transformar industrias, e blockchain permitirá evolucionar a un modelo que ofreza servizos de valor engadido, centrándose na relación cos clientes.”