ABANCA e Nueva Rula de Avilés colaboran para impulsar a mellora do sector pesqueiro e a sostibilidade

  • A entidade financeira e Nueva Rula de Avilés traballan conxuntamente para abordar os retos actuais aos que se enfronta o sector
  • O banco pon a disposición dos pescadores un catálogo de produtos e un equipo profesional especializado a través da súa unidade ABANCA Mar

O director de zona de ABANCA en Asturias, José María Jardón, e o director da oficina de ABANCA en Avilés, José Manuel Carballeira, xunto co xerente de Nueva Rula de Avilés, Ramón Álvarez.

Descarga en alta resolución Serás redirixido a outro sitio web e abrirase nunha nova ventá

ABANCA e Nueva Rula de Avilés acaban de renovar un ano máis o seu convenio financeiro de colaboración co foco posto en responder ás necesidades dun sector fundamental e estratéxico para a economía do Principado.

O acordo foi asinado esta mañá en Avilés polo director de zona de ABANCA en Asturias, José María Jardón, e polo xerente de Nueva Rula de Avilés, Ramón Álvarez. A rúbrica deste convenio evidencia e reforza o compromiso que mantén a entidade financeira co sector pesqueiro e en xeral co tecido produtivo asturiano.

No documento detállanse unha serie de condicións específicas na contratación de produtos e servizos do banco que beneficiarán aos pescadores asociados de Nueva Rula. Así, recóllese un extenso catálogo de financiamento con liñas de crédito e solucións deseñadas pola unidade especializada ABANCA Mar para dar resposta ás principais problemáticas da actividade pesqueira, como pode ser a caída puntual de ingresos; promover o relevo xeracional e modernizar a frota de cara a consolidar un modelo máis sostible. A maiores, o acordo contempla o anticipo de subvencións do Fondo Europeo Marítimo Pesqueiro (FEMP) e Next Generation.

Produtos a medida

O convenio tamén recolle produtos creados a medida, como a hipoteca naval, que permite a construción ou renovación de embarcacións vinculadas á actividade pesqueira e outros produtos para a mellora da competitividade dos pescadores, como pólizas de crédito, préstamos persoais ou hipotecarios, leasing mobiliario, avais, seguros especializados ou anticipos de inversións sostibles.

Grazas a este acordo, os membros de Nueva Rula de Avilés poderán gozar das vantaxes que lles ofrece o Programa Cero Comisións de ABANCA, que permite deixar de pagar polo mantemento de contas e tarxetas, transferencias, ingresos de cheques e outros servizos habituais.

Desde 2016, a entidade financeira conta con ABANCA Mar, unha unidade especializada no sector do mar e a pesca que ofrece un amplo catálogo de produtos e servizos ideados para responder ás demandas deste colectivo ofrecendo solucións personalizadas a problemáticas puntuais do sector.

Nueva Rula de Avilés é a entidade encargada da xestión da instalación portuaria de primeira venda de produtos pesqueiros e atópase no porto de Avilés. A súa lonxa conta actualmente cun dos sistemas de venda máis avanzados de Europa.