ABANCA e o Colegio Oficial de Graduados Sociales de Asturias acordan opcións de financiamento
- A organización colexial e a entidade galega traballan xuntos nunha oferta financeira vantaxosa para os profesionais e os seus familiares
- Os colexiados accederán ao servizo ABANCA Persoal, que permite contar con atención continuada e persoal, así como unha análise fiscal e un asesoramento financeiro adaptados
O decano do Colegio Oficial de Graduados Sociales de Asturias, Marcos Óscar Martínez, e o Director Territorial de Asturias e León de ABANCA, Marcos Lamas, durante a firma.
ABANCA e o Colegio Oficial de Graduados Sociales de Asturias acaban de asinar un acordo de colaboración en materia financeira, co obxectivo de mellorar o acceso ao crédito dos profesionais colexiados e as súas familias.
O Director Territorial de Asturias e León de ABANCA, Marcos Lamas Seoane, e o decano do Colegio Oficial de Graduados Sociales de Asturias, Marcos Óscar Martínez Álvarez, rubricaron en Oviedo un acordo de colaboración que establece condicións especiais na contratación de produtos e servizos da entidade, con importantes vantaxes con respecto ao mercado.
O convenio recolle unha ampla oferta de produtos deseñados para mellorar a competitividade deste colectivo de profesionais, entre os que destacan préstamos persoais e hipotecarios para negocio, pólizas de crédito, leasing mobiliario ou avais. O protocolo tamén estipula que os membros desta asociación poderanse beneficiar das fórmulas de financiamento oficiais incluídas nos convenios que ABANCA mantén con diversos organismos públicos.
Así mesmo, os colexiados poderán beneficiarse de condicións financeiras vantaxosas para atender necesidades persoais ou das súas familias, a través de produtos como a Tarifa Plana de Seguros ou os fondos de investimento, entre outros. ABANCA tamén poñerá a disposición do colexio o seu servizo de banca a distancia.
A entidade ofrecerá o servizo de ABANCA Persoal, pensado especificamente para dar cobertura ás necesidades persoais e familiares dos colexiados grazas a unha unidade especializada dirixida para prestar un servizo de asesoramento e xestión integral dos clientes. Grazas a este servizo os asociados poderán dispoñer dun equipo de expertos e un asesor persoal coñecedor dos mercados financeiros, de produtos e da súa fiscalidade e con ampla experiencia na xestión de patrimonios. Ademais, accederán a un catálogo de produtos propio adaptado ás súas peticións de rendibilidade e risco.
Doutra banda, os colexiados e as súas familias poderán beneficiarse do programa Cero Comisións de ABANCA, que permite deixar de pagar polo mantemento das contas e as súas tarxetas, pero tamén polas transferencias, ingresos de cheques ou servizos habituais. Ademais, o documento asinado pon a disposición dos profesionais adheridos a este colexio tarifas personalizadas na alta e mantemento dos dispositivos Terminal Punto de Venda.
O Colegio Oficial de Graduados Sociales de Asturias fundouse en 1961 co obxectivo de apoiar e defender os intereses deste colectivo de profesionais no Principado. Pola súa banda, ABANCA é unha das entidades de referencia no panorama financeiro do noroeste español. Cun total de once oficinas na comunidade asturiana, ofrece alternativas especificamente deseñadas para particulares, autónomos e empresas.