ABANCA e o Consorcio do Salnés promoven as compras no comercio local con premios aos clientes

24-03-2017

ABANCA e o Consorcio do Comercio do Salnés presentaron hoxe unha promoción conxunta coa que ambas as entidades pretenden, mediante o sorteo de premios entre os clientes, dinamizar as vendas no pequeno comercio da zona.

No marco desta iniciativa, os clientes de ABANCA que utilicen APRAZOSSerás redirixido a outro sitio web, o servizo de compras do banco, en calquera dos establecementos adheridos ás asociacións do Consorcio do Comercio do Salnés participarán no sorteo de varios agasallos. Sortearanse cinco premios de 500 euros, cinco tarxetas regalo de 50 euros, cinco reloxos intelixentes da marca Samsung e dez televisores led de 32 polgadas. Entrarán na promoción as compras realizadas entre o 15 de marzo e o 15 de maio.

A acción foi presentada esta mañá en Cambados polo presidente do Consorcio do Comercio do Salnés, Juan Rey Rodríguez, e a directora territorial de ABANCA en Pontevedra, Carmen Fernández Penas. O acto contou tamén coa asistencia dos presidentes das distintas asociacións de comerciantes que integran o Consorcio e dos directores de zona de ABANCA en Arousa / Salnés e Pontevedra Ría, Víctor Manuel Vázquez Saavedra e Alberto Varela Reiriz, respectivamente.

Durante a presentación, Juan Rey Rodríguez destacou a importancia deste tipo de acordos que facilitan o acto de compra no comercio de proximidade e que xeran sinerxías beneficiosas para o pequeno comercio, un sector que conta cunha importante presenza na nosa contorna.

Pola súa banda, Carmen Fernández Penas explicou que esta promoción “é un exemplo máis do compromiso irrenunciable de ABANCASerás redirixido a outro sitio web co pequeno comercio”. A directora territorial de ABANCA en Pontevedra resaltou que “a través do servizo APRAZOS apoiamos ao comercio minorista dende unha dobre vertente: apoiamos ao comerciante achegándolle ferramentas coas que pode vender máis, ofrecendo financiamento equiparable aos sistemas que teñen as grandes superficies; e favorecemos o consumo dando crédito ao cliente final no lugar e no momento en que o precisa”.

Aprazamento das compras cómodo e inmediato

APRAZOS, o servizo de compras de ABANCA, permite aos clientes do banco financiar as súas compras no propio punto de venda, de forma cómoda, sinxela, rápida e inmediata, sen papelorios. O servizo ofrece dúas modalidades de aprazamento: coa tarxeta de crédito ABANCA, a través do Terminal Punto de Venda (TPV) do establecemento; ou aprazamento unicamente co DNI, a través dun portal web específico que a entidade financeira pon a disposición dos comercios.

Coa tarxeta de crédito, os clientes poden aprazar as súas compras ata en 36 meses sen xuros nin comisións. Pola súa banda, a opción de financiamento sen necesidade de dispoñer de tarxeta de crédito permite o aprazamento dos pagos ata en 60 meses.