ABANCA e Rio Natura Monbus Obradoiro renovan o seu convenio

  • A entidade financeira e o club de baloncesto consolidan a súa colaboración e amplían o acordo por tres anos máis
  • Os seareiros do equipo compostelán que paguen as súas entradas con tarxetas de ABANCA beneficiaranse dun 5% de desconto

De esquerda a dereita, o ala-pívot de Rio Natura Monbus Obradoiro, Angelo Caloiaro; o director territorial de ABANCA en Santiago, Juan Carlos Carneiro; o conselleiro do club, Rafael Silva; e o adestrador do conxunto, Moncho Fernández.

Descarga en alta resolución Serás redirixido a outro sitio web e abrirase nunha nova ventá

De esquerda a dereita, o ala-pívot de Rio Natura Monbus Obradoiro, Angelo Caloiaro; o adestrador do conxunto, Moncho Fernández; o director territorial de ABANCA en Santiago, Juan Carlos Carneiro; o conselleiro do equipo, Rafael Silva; e o director xeral do club, José Luis Mateo.

Descarga en alta resolución Serás redirixido a outro sitio web e abrirase nunha nova ventá

ABANCA e Rio Natura Monbus Obradoiro asinaron esta mañá a renovación do convenio de patrocinio que liga á entidade financeira co club de baloncesto galego. A rúbrica, que tivo lugar en instalacións de ABANCA na capital, contou coa presenza do director territorial de ABANCA en Santiago, Juan Carlos Carneiro, o director xeral do club, José Luis Mateo, e o conselleiro Rafael Silva. No acto tamén participaron o adestrador do conxunto, Moncho Fernández, e o ala-pívot Angelo Caloiaro.

Grazas a este texto, o banco con sede en Galicia segue colaborando co único equipo galego que milita na Liga Endesa. Esta alianza estratéxica, que se estenderá inicialmente por tres temporadas máis, permitirá a ABANCA manter o seu espazo na parte posterior da camiseta, así como unha área publicitaria destacada no Multiusos Fontes do Sar.

A presentación tamén serviu para anunciar que os clientes de ABANCA poderanse beneficiar dun desconto do 5% se pagan as súas entradas para ver o Rio Natura Monbus Obradoiro con tarxetas da entidade financeira.

Para o director territorial de ABANCA en Santiago, Juan Carlos Carneiro, “o acordo é unha aposta de presente e futuro, que conta cunha clara vocación de permanencia”. Carneiro tamén destacou “a abafadora traxectoria de compromiso de ABANCA co mundo do deporte en Galicia” e valorou positivamente “dende os acordos cos grandes equipos, como é este que presentamos, ata o apoio ao deporte base”.

Pola súa parte, Rafael Silva, conselleiro do club, fixo énfase en que a entidade, que agora segue ao lado do club, “tamén estivo nos momentos máis difíciles do club, como na concesión dun préstamo para aboar o canon de Ascensos e Descensos da ACB co único aval das empresas do Consello de Administración e non de institucións públicas”. Silva recordou que “para o club é un orgullo levar no seu equipamento o nome de entidades que queren traballar por Galicia, como é o caso de ABANCA, e que percorrerá este camiño co club e a masa social para facer crecer ese sentir común”.

Tamén tivo palabras positivas Moncho Fernández, técnico do club, que recordou “como obradoirista” a importancia de que “entidades da talla de ABANCA se impliquen nun proxecto que se vai estabilizando pouco a pouco na Liga Endesa”.