ABANCA entrega 4.855 quilos de produtos ao Banco de Alimentos

ABANCA entregou ao Banco de Alimentos 4.855 quilos de produtos doados polo cadro de persoal da entidade financeira galega durante a campaña desenvolvida este Nadal nas súas territoriais de Galicia, León e Madrid

Os produtos recolléronse durante as ceas de Nadal que se celebraron en cada unha destas territoriais. Ademais, 35 empregadas e empregados participaron como voluntarios antes, durante e despois de cada recollida garantindo que todo saíse de forma correcta.

A doazón centrouse, sobre todo, en alimentos para bebés, cueiros, leite, etc. Os directores territoriais de ABANCA na Coruña, Santiago, Lugo, Pontevedra, Vigo, Ourense, León e Madrid foron os encargados de entregar estes produtos ao Banco de Alimentos de cada cidade que, a partir de agora, serán distribuídos ás familias máis necesitadas.

A posta en marcha desta iniciativa por parte de ABANCA Obra Social enmárcase dentro da política de responsabilidade social corporativa da entidade financeira coa que pretende mostrar o apoio e compromiso de ABANCA cos problemas da nosa contorna.