ABANCA estreita a súa colaboración cos armadores de Burela para ofrecer solucións financeiras sostibles ao sector

Ambas as entidades fixan como obxectivo impulsar cuestións clave como a renovación da frota ou responder ao financiamento de estacionalidades
O banco ofrece o seu coñecemento do sector, a través da unidade especializada ABANCA Mar, para transformar o mundo da pesca e reforzar a súa competitividade

Representantes de ABSA e de ABANCA, durante o acto na caseta da entidade financeira na XIX Feira Expomar.

Descarga en alta resolución Serás redirixido a outro sitio web e abrirase nunha nova ventá

11-05-2023

ABANCA e Armadores de Burela S.A. (ABSA) acaban de renovar o seu histórico acordo de colaboración co obxectivo de dar resposta ás demandas dun sector fundamental para a comarca da Mariña e para o resto de Galicia. A firma do novo convenio tivo lugar en Burela, coincidindo coa celebración da XIX Feira Expomar, que conta cunha caseta propia de ABANCA.

A directora territorial de ABANCA en Lugo, Zaira Dapena, foi a encargada de asinar o acordo co presidente de Armadores de Burela S.A., Abelardo Basanta. Ao acto tamén asistiron o xerente de ABSA, Miguel Neira; o director de ABANCA Mar, Javier Fraga, o coordinador da mesma unidade, Miguel Ríos; o director de zona de ABANCA na Mariña-Terra Chá, Carlos Teijeiro; e o director da oficina de ABANCA en Burela, José Javier Parga. Tras a rúbrica, ambas as entidades destacaron a transcendencia de manter este tipo de alianzas, sobre todo despois duns anos especialmente complicados para o sector debido á crise sanitaria, as posteriores dificultades derivadas da invasión rusa de Ucraína e os novos requisitos da política pesqueira comunitaria.

Este acordo supón unha aposta clara pola mellora integral da sustentabilidade do sector, fomentando a renovación da frota e a substitución das embarcacións actuais por outras máis eficientes e respectuosas co medio ambiente, con financiamentos de hipotecas navais adecuadas na estrutura necesaria para o armador. Ademais, o acordo tamén recolle un extenso catálogo de financiamento con liñas e solucións de crédito deseñadas para responder aos problemas cotiáns da actividade pesqueira, avanzar na resposta ao financiamento de estacionalidades e o anticipo de subvencións do novo Fondo Europeo Marítimo de Pesca e de Acuicultura (FEMPA).

O texto dá igualmente cabida a outros produtos que tamén facilitan a mellora da competitividade dos asociados, como pólizas de crédito, préstamos persoais e hipotecarios, leasing mobiliario, avais ou seguros especializados, entre outros.

Ao servizo do sector pesqueiro

ABANCA mantén unha estreita vinculación co sector primario e o seu tecido industrial en Galicia, e moi especialmente co complexo mar-industria. A entidade financeira conta cunha unidade especializada, ABANCA Mar, pioneira e exclusiva na banca española, que ofrece respostas a medida a toda a cadea de valor a través dun equipo de profesionais altamente formados e un catálogo de produtos e servizos propio que se adapta ás necesidades de cada momento.