ABANCA finaliza con éxito a integración do negocio de Novo Banco

24-10-2022

ABANCA finalizou a integración do negocio de Novo Banco en España coa realización da última operación do proceso, o paso da actividade á plataforma tecnolóxica e operativa de ABANCA. O proceso completouse esta fin de semana con éxito e sen incidencias. Os clientes de Novo Banco poden operar xa con total normalidade, tanto de maneira presencial na rede de oficinas de ABANCA, como a través das súas canles de banca a distancia (banca electrónica, móbil e telefónica). A migración tecnolóxica pon fin a un proceso iniciado en abril de 2021 co anuncio do acordo preliminar entre ABANCA e Novo Banco SA para a compravenda do negocio de Novo Banco en España.

A operación robustece o posicionamento de ABANCA en España, moi especialmente en Madrid; e en segmentos de negocio que son estratéxicos para a entidade, como o negocio de banca Persoal e Privada e o negocio de empresas, especialmente na operatoria fóra de balance e a actividade exterior.

Novo Banco achega potencial de crecemento en liñas como a actividade aseguradora. O negocio asegurador atópase en pleno crecemento en ABANCA tras o relanzamento da compañía de Vida e a creación de ABANCA Seguros Generales conxuntamente con Crédit Agricole Assurances, que xa conta con varios produtos propios no mercado.

Migración de 260.000 contratos

Todo o proceso de integración tecnolóxica (planificación, ensaios previos e paso definitivo á plataforma ABANCA) desenvolveuse segundo o calendario previsto e sen incidencias. As operacións foron realizadas por un equipo de máis de 300 profesionais e 12 grupos de traballo de ambas as entidades. En total, executáronse 1.460 tarefas e 3 ensaios para completar a migración de 661 millóns de rexistros e 260.929 contratos.

A integración tecnolóxica supón vantaxes significativas para os clientes de Novo Banco, que se benefician de maiores capacidades tecnolóxicas, atención persoal nunha rede de 624 oficinas en España e 678 en todo o mundo, acceso a 1.166 caixeiros automáticos propios e outros 14.500 froito dos acordos con Euro 6000 e outras entidades financeiras, especialización en segmentos como empresas, banca privada e persoal, seguros, agro, mar, e crédito ao consumo, maior diversificación do catálogo de produtos, e presenza internacional en 11 países de Europa e América.

Sexta operación corporativa desde 2014

ABANCA probou con éxito o seu modelo de integración doutras entidades nas operacións corporativas que realizou nos últimos anos. A primeira foi a integración en 2014 do Banco Etcheverría; en 2017 realizouse a compra de Popular Servizos Financeiros; en 2018, ABANCA adquiriu Deutsche Bank PCB, e tamén en 2018 comprou a Caixa Geral de Depósitos o seu banco en España, Banco Caixa Geral. En 2020 produciuse a compra de Bankoa, cuxo proceso de integración en ABANCA finalizou no cuarto trimestre de 2021.