ABANCA gaña 501 millóns de euros, antes de impostos, cunha rendibilidade do 12,2%

27-07-2026

ABANCA obtivo no primeiro semestre de 2026 un beneficio antes de impostos de 501 millóns de euros, un 3,7% máis ca no exercicio anterior. O beneficio despois de impostos situouse en 386 millóns, un 9,6% menos ca no mesmo período do ano anterior, debido ao incremento da taxa fiscal efectiva provocado polo menor uso de créditos fiscais. A rendibilidade ROTE situouse no 12,2%, cunha elevada folgura sobre o coste do capital.

O resultado obtido baséase no crecemento eficiente do negocio e na boa xestión do balance. A través do seu modelo de crecemento rendible e solvente, ABANCA segue mostrando un elevado dinamismo comercial e intensifica a captación de novos clientes reforzando a súa franquía ibérica. A entidade incorporou no semestre máis de 77.000 novos clientes no conxunto de España e Portugal, maioritariamente (un 71%) en áreas distintas á súa zona de orixe.

Grazas ao desenvolvemento dun amplo plan de iniciativas para incrementar a calidade do servizo, este forte ritmo de crecemento acompáñase de elevados índices de satisfacción: tres de cada catro novos clientes valoran a súa relación coa entidade cunha nota de 9 ou máis puntos (sobre 10).

ABANCA creceu con intensidade en todas as liñas de negocio, especialmente na xestión do aforro. Os recursos de clientes creceron un 7,2%, ata os 87.249 millóns de euros, destacando o capítulo de fondos de investimento, no que o banco logrou unha cota de subscricións do 9,6%.

O banco destinou un total de 10.000 millóns de euros en nova financiamento a particulares e empresas, con crecementos das novas formalizacións do 14,4% e do 7,8% respectivamente, permitindo que o crédito ao sector privado aumentase un 3,8%.

A entidade bateu ao mercado nas principais liñas de negocio, rexistrando incrementos de cota de mercado de 8 p.b. en crédito, de 3 p.b. en captación de recursos de clientes, de 7 p.b. en plans de pensións, de 2 p.b. en seguros de aforro, e de 12 p.b. en seguros xerais.

B100, a proposta 100% dixital de ABANCA, continúa o seu crecemento multiplicando por 1,6 o seu volume de negocio e duplicando o número de clientes. A entidade continúa avanzando no despregamento da súa gama de produtos co lanzamento da contratación e xestión de fondos de inversión na app, e un produto, o Préstamo B100, para ampliar a oferta de financiamento xunto coa tarxeta de crédito Pay to Save Plus. O carácter diferencial de B100, baseado no coidado da saúde financeira, personal e do planeta, combina unha novidosa experiencia de usuario con logros medioambientais e sociais.

ABANCA está situada á vangarda do proceso de creación do ecosistema de diñeiro dixital seguro. A entidade participa en Qivalis para o lanzamento dunha ferramenta financeira europea, independente, confiable e aberta a cidadáns e empresas (stablecoin). Ademais, foi seleccionada polo Eurosistema para o piloto de desenvolvemento do euro dixital.

Os sólidos fundamentais de ABANCA, así como o bo desempeño amosado nos indicadores clave, estanse traducindo nunha excelente acollida por parte dos mercados. En maio a entidade realizou unha emisión de débeda senior por importe de 500 millóns de euros, cunha subscrición de 2,6 veces o importe emitido grazas ás 80 ordes recibidas. As cualificacións recibidas das axencias de rating amosan a mesma tónica positiva, tal e como se aprecia nas recentes melloras acadadas.

Resultados sólidos e diversificados

O beneficio antes de impostos correspondente aos primeiros seis meses do ano elevouse por riba dos 500 millóns de euros, un 3,7% máis ca no mesmo período do exercicio pasado. O forte crecemento acadado nos ingresos por servizos, do 16,1% respecto a xuño de 2025, reforza a diversificación do resultado. A rendibilidade ROTE situouse no 12,2%, superando claramente o custo do capital.

A entidade recuperou o crecemento da marxe de intereses trimestral, que creceu un 4% respecto ao primeiro trimestre de 2026 e un 2,1% respecto ao segundo de 2025. A boa dinámica comercial e a xestión de prezos permítenlle á entidade prever unha evolución positiva da marxe nos vindeiros trimestres.

Os ingresos por prestación de servizos creceron un 11,0% interanual no segundo trimestre do ano. As diferentes compoñentes amosan un comportamento positivo ao peche do semestre:: +7,0% en contratos de seguros, +46,6% en servizos bancarios, +0,5% en cobros e pagos, e +18,2% en fóra de balance e seguros.

O aproveitamento de sinerxías procedentes das operacións corporativas, sumado á aplicación de políticas de racionalización, permítelle ao banco controlar o crecemento dos seus custos e situalos por debaixo da media do sector (3,3% fronte a 5,3%). Como resultado, o cociente de eficiencia mellorou en 72 p.b. no segundo trimestre do ano.

A pesar dos seus elevados niveis de cobertura, ABANCA mantén a prudencia na dotación de provisións. O custo do risco mantense controlado, nun nivel de 25 p.b., cun cociente de morosidade do 1,9% e unha taxa de cobertura deses activos do 85,4%.

Crecemento en todos os negocios e xeografías

O volume de negocio xestionado pola entidade supera xa os 145.000 millóns de euros, unha cifra un 8,4% superior á de xuño de 2025. O crédito á clientela situouse en 58.151 millóns de euros, mentres que os recursos totais alcanzaron os 87.249 millóns.

O crédito en situación normal alcanzou os 57.397 millóns de euros, un 10,6% de aumento. Destacan especialmente as empresas e familias, que supoñen o 82%, e que aumentaron o seu saldo un 3,8% en termos interanuais.

A captación de recursos de clientes creceu un 7,2% interanual, ata os 87.249 millóns de euros. Por tipoloxía de produtos, o 75% do total corresponde a depósitos á vista e a prazo, mentres que o 25% restante a recursos fóra de balance (fondos de investimento, pensións e seguros de aforro).

Os depósitos de clientes creceron un 2,7% interanual, ata os 65.179 millóns. Os saldos á vista aumentaron un 5,2%. A carteira presenta un perfil netamente minorista: sobre o total, o 93% corresponde a familias e empresas, e a maioría (69%) ten un saldo inferior aos 100.000 euros.

A entidade crece con intensidade tanto en fóra de balance coma en comercialización de seguros. Os recursos fóra de balance alcanzan os 22.070 millóns de euros, rexistrando un crecemento do 23,3% en termos interanuais.

As primas de seguros xerais e de vida risco aumentaron un 11,4%, ata os 719 millóns de euros. Por liñas, as primas de seguros de decesos creceron un 25%, mesma cifra que nas de seguros de vida risco. Pola súa banda, as primas de seguros de empresas aumentaron un 16%, e as de seguros de saúde un 12%.

Sólido perfil financeiro

Trimestre tras trimestre, ABANCA mantén a súa posición como unha das entidades máis sólidas do mercado ibérico. Os seus sólidos fundamentais permítenlle afrontar o actual contorna de incerteza dende unha base robusta.

ABANCA presenta cocientes do 18,4% en capital total e do 13,8% en CET1. A rendibilidade sobre capital CET1 é do 14,4%. Estas cifras alcánzanse a pesar do impacto de -34 p.b. derivado do crecemento do crédito no trimestre.

A entidade mantén un amplo colchón de capital sobre requisitos. O exceso sobre requisitos de capital aumentou un 8,3% interanual e está situado en 2.127 millóns de euros, o que equivale a 544 p.b. O cociente MREL está situado no 23,5%, cun colchón de 554 millóns de euros (142 p.b.) sobre os requisitos regulatorios.

A entidade segue na súa senda de redución de crédito dubidoso e activos inmobiliarios, mentres aumenta os seus xa elevados niveis de cobertura. Os saldos dubidosos descenderon un 10,0% interanual, de xeito que a taxa de mora se situou no 1,9%, mentres que os niveis de cobertura se situaron no 85,4%.

En materia de liquidez, ABANCA dispón de 20.982 millóns de euros en activos líquidos, cifra equivalente a máis de 4 veces os seus vencementos previstos de emisións. Adicionalmente dispón dunha capacidade de emisión de cédulas de 7.741 millóns de euros, o que sitúa a súa posición de liquidez en 28.723 millóns de euros.

A estrutura de financiación é netamente minorista, cun 85% de depósitos minoristas sobre o total e unha ratio LTD minorista do 89,2%. En liquidez, ABANCA presenta ratios do 139% en financiación neta estable (NSFR) e do 187% en cobertura de liquidez (LCR). Os activos líquidos de alta calidade (HQLA) sitúanse nunha cifra total de 12.592 millóns de euros.

Banca responsable e sostible

Paralelamente ao desenvolvemento da súa actividade de negocio, a entidade segue a reforzar a súa contribución á sociedade a través da súa estratexia de sostibilidade.

Durante o trimestre, cómpre destacar o recoñecemento outorgado ao modelo de xestión do talento da entidade, que recibiu o premio Best Company for All Talent da revista Equipos&Talento, pola súa capacidade para integrar e xestionar o talento interno da mellor forma posible; o selo internacional Top Employer Spain 2026, que certifica a máis de 2.400 organizacións de 125 países polos seus excelentes contornos de traballo; e a súa inclusión no ranking ‘Europe’s Best Employers’, de The Financial Times e Statista, como segunda mellor empresa española para traballar e posto 159 entre 1.000 compañías europeas.

Ademais de seguir apoiando os seus clientes no proceso de descarbonización da economía, o banco lanzou novas accións no ámbito social.

En colaboración con Afundación, nas últimas semanas procedeu á entrega a municipios especialmente ameazados de 1.053 kits de resposta rápida para a extinción de incendios forestais.

Tamén cómpre mencionar a campaña de doazóns organizada polo banco a favor da Cruz Roja Venezolana para apoiar a resposta humanitaria tras os recentes terremotos.

Destacan tamén neste apartado os logros medioambientais e sociais acadados por B100, coma as 20 toneladas de plásticos recollidas a partir das compras realizadas coas súas tarxetas ou a cesión do 25% dos ingresos xerados por taxa de intercambio para proxectos medioambientais.

A excelente práctica ESG da entidade é respaldada pola axencia de cualificación Sustainalytics, do grupo Morningstar, que mantén a ABANCA como segunda mellor entidade mundial da súa categoría.