RESULTADOS 1T 2026: ABANCA gaña 207,5 millóns de euros, cunha rendibilidade do 13,2%

28-04-2026

ABANCA obtivo no primeiro trimestre do 2026 un beneficio atribuído de 207,5 millóns de euros, cunha rendibilidade ROTE do 13,2%. O resultado obtido baséase no crecemento eficiente do negocio e na boa xestión do balance.

A entidade segue destacando polo seu elevado dinamismo comercial gañando cota de mercado en todos os ámbitos do negocio. O crédito a familias e empresas aumentou un 4,0% mentres que os recursos de clientes creceron un 5,2%. Outras liñas de negocio como distribución de fondos de investimento e pensións, seguros ou medios de pago tamén tiveron un desempeño moi relevante e superior á media do sector.

Así, os fondos de investimento aumentaron un 27,1% no caso de ABANCA vs 13,0% sector, os seguros xerais e vida risco creceron un 24,7% (vs 8,9%) e as operacións en medios de pago un 12,1% (vs 8,3%). Como resultado, a cota de mercado en recursos fóra de balance aumentou en 21 p.b.

Esta mesma tónica de crecemento obsérvase na evolución da base de clientes, que segue aumentando en todos os territorios onde opera a entidade. ABANCA incorporou máis de 37.000 novos clientes no primeiro trimestre do ano, un crecemento un 2% superior ao acadado no mesmo período do ano anterior. O 71% das novas altas proceden de áreas xeográficas distintas a aquelas nas que a entidade é líder do mercado.

Este crecemento vese acompañado dun ambicioso plan de iniciativas para incrementar a calidade no servizo, que ten o seu reflexo nun crecemento de dous puntos no índice IPN (Índice de Prescrición Neta), que alcanza os 46 puntos. Ademais, tres de cada catro novos clientes valoran a súa relación co banco cunha nota de 9 ou máis (sobre 10 puntos).

Este bo desempeño comercial e a adecuada xestión do balance permitirá á entidade seguir optimizando a súa marxe nunha contorna de turbulencias xeopolíticas, así como continuar reforzando o seu perfil financeiro. ABANCA pechou o trimestre con cociente de capital CET1 do 13,8%, cociente Texas do 17,5%, cociente de morosidade do 1,97%, exceso de capital sobre requisitos de máis 2.100 millóns de euros e cobertura de activos dubidosos do 84,8%.

Os sólidos fundamentais do banco están sendo recoñecidos polas axencias de rating nas súas cualificacións. As catro que avalían a ABANCA sitúana en grao de investimento e elevaron o seu rating nos últimos 18 meses, algunhas delas en varios chanzos. DBRS e Moody´s sitúan xa a ABANCA na categoría A, o bloque de cualificacións máis elevado das axencias.

A adopción intensiva da IA está permitindo a ABANCA obter significativas melloras en produtividade e experiencia de cliente. A entidade segue avanzando na senda iniciada en 2025: incorporáronse novas funcionalidades comerciais e estendeuse o ámbito de uso da IA axéntica, impulsando con iso a personalización da oferta, o incremento do tempo comercial e a transformación de procesos. Os 110 casos de uso implantados ata o momento sitúan a ABANCA entre os bancos cun maior grao de adopción da IA (Gartner, 2025).

O máis destacado do trimestre en materia de sostibilidade é a renovación do nivel ‘Risco inapreciable’ (‘Negligible risk’), o mellor posible, na revisión do rating ESG de Sustainalytics, a obtención da certificación do Índice de Bo Goberno Corporativo (IBGC) de AENOR e do selo Top Employer 2026 do Top Employers Institute. Tamén destacou a celebración de diferentes accións de educación financeira para mozos e maiores.

Robusta evolución do negocio en todas as xeografías

O volume de negocio xestionado por ABANCA supera xa os 138.000 millóns de euros, un 6,5% máis ca en marzo de 2025. O crédito á clientela situouse en 54.332 millóns de euros, mentres que os recursos totais alcanzaron os 83.795 millóns.

A carteira de crédito en situación normal incrementouse nun 9,0%, coas empresas e familias, que supoñen o 84%, como compoñente maioritario. O crédito ao sector privado creceu nun 4,0% en termos interanuais.

Pola súa banda, a captación de recursos de clientes creceu un 5,2% interanual, ata os 83.795 millóns. Por tipoloxía de produtos, o 76% do total corresponde a depósitos á vista e a prazo, mentres que o 24% restante a recursos fóra de balance (fondos de investimento, pensións e seguros de aforro).

A parte correspondente a depósitos de clientes supera xa os 63.000 millóns, tras medrar un 1,3% interanual. A carteira presenta un perfil netamente minorista: un 94% dos depósitos corresponde a familias e empresas, e a maioría ten un saldo inferior aos 100.000 euros.

Paralelamente, o fóra de balance crece con intensidade. Os recursos fóra de balance alcanzan os 20.519 millóns de euros a finais do trimestre, un crecemento do 19,3% en termos interanuais.

Pola súa banda, as primas de seguros xerais e de vida risco aumentaron un 15,0%, ata os 681 millóns de euros. Destacaron as achegas dos produtos de decesos (que creceron un 29%), vida risco (un 23%), pagos protexidos (un 10%) e empresas (un 9%).

Resultados de alta calidade

O resultado obtido por ABANCA no primeiro trimestre de 2026 reflicte a elevada capacidade da entidade para xerar resultados de alta calidade de maneira recorrente. A contribución á marxe de intereses procedente do negocio con clientes continuou a súa senda de crecemento, co aumento en volume compensando o forte descenso dos tipos de interese. A boa xestión do balance permitirá á entidade seguir optimizando a súa marxe no volátil contorno de tipos actual.

Os ingresos por prestación de servizos creceron nun 21,6%, con incrementos en todos os compoñentes. Cobros e pagos aumentou un 8,4%, complementados por un 18,6% en seguros de vida e un 18,2% en fóra de balance e seguros xerais.

O aproveitamento de sinerxías e as políticas de racionalización permiten a ABANCA controlar a súa base de custos. A entidade anticipou gastos para reforzar a xeración de resultado dos próximos trimestres e segue implementando medidas de eliminación de gasto. O cociente de eficiencia continúa a súa aproximación ao limiar do 50% tras un novo descenso de 0,5 p.p. no último trimestre respecto ao mesmo período do ano pasado.

ABANCA mantén a prudencia na dotación de provisións a pesar dos seus elevados niveis de cobertura. O custo do risco mantense controlado, nun nivel do 0,26%, cun cociente de morosidade do 1,97% e unha taxa de cobertura deses activos do 84,8%.

Sólido perfil financeiro

ABANCA mantén unha posición estable como unha das entidades máis sólidas do mercado ibérico. A capacidade de xeración orgánica de capital e a prudencia na súa xestión permiten á entidade incrementar o seu negocio mantendo á vez amplos colchóns sobre os requisitos regulatorios de solvencia.

ABANCA presenta cocientes do 18,5% en capital total e do 15,7% en rendibilidade sobre CET1. Durante o trimestre, ABANCA tivo un crecemento de APRs do 3,0% que tivo un impacto na súa ratio de capital de 42 p.b.

O exceso sobre requisitos SREP aumentou un 10,2% interanual e está situado en 2.116 millóns de euros, o que equivale a 554 p.b. O cociente MREL está situado no 23,7%, cun colchón de máis de 600 millóns de euros (160 p.b.) sobre os requisitos regulatorios.

A entidade segue reducindo crédito moroso e activos inmobiliarios mentres aumenta os seus xa elevados niveis de cobertura. Os saldos dubidosos descenderon un 16,4% interanual, mentres que os activos adxudicados o fixeron nun 14,2%. Pola contra, os niveis de cobertura eleváronse ata o 84,8% no caso da taxa NPL, ata o 80,6% a NPA e ata o 67,4% a de adxudicados.

O cociente NPL está situado no 1,97%, con homoxeneidade entre España e Portugal, que presentan cifras do 1,93%, e o 2,18% respectivamente. O cociente NPA está situado no 2,6% e o peso dos activos adxudicados no 0,1% sobre balance.

En materia de liquidez, ABANCA dispón de 22.168 millóns de euros en activos líquidos, cifra equivalente a 4,8 veces os seus vencementos previstos de emisións. Adicionalmente dispón dunha capacidade de emisión de cédulas de 7.367 millóns de euros, o que sitúa a súa posición total en 29.534 millóns de euros.

A estrutura de financiamento é netamente minorista, cun 86% de depósitos minoristas sobre o total e un cociente LTD minorista do 85,9%. En liquidez, ABANCA presenta cocientes do 142% en financiamento neto estable (NSFR) e do 191% en cobertura de liquidez (LCR). Os activos líquidos de alta calidade (HQLA) totalizan 13.802 millóns de euros.

Banca responsable e sostible

Na última revisión do seu rating ESG, publicada en febreiro, a axencia de cualificación Sustainalytics, do grupo Morningstar, mantén a ABANCA no nivel de ‘Risco inapreciable’ (‘Negligible risk’), o mellor posible. ABANCA sitúase como segunda entidade mundial da súa categoría.

ABANCA obtivo recentemente a certificación do Índice de Bo Goberno Corporativo (IBGC) de AENOR co nivel G++, a máxima cualificación posible. Este logro apoia o nivel de excelencia do modelo de gobernanza de ABANCA, igualando os seus estándares de xestión coas mellores prácticas das principais entidades cotizadas do país.

Por outra banda, a entidade foi distinguida co selo Top Employer 2026, do Top Employers Institute, en recoñecemento a aspectos como as oportunidades de desenvolvemento, o seu fomento dunha contorna de traballo positiva e o seu compromiso co benestar das persoas.

O impulso da educación financeira dos distintos grupos de idade, en particular de mozos e maiores, foi o obxectivo de diferentes iniciativas impulsadas por ABANCA e a súa Obra Social, Afundación. Ambas uníronse, unha edición máis, á ‘Global Money Week (GMW)’, iniciativa internacional de concienciación coordinada pola OCDE. Ademais puxeron en marcha un novo programa denominado ‘Money Sport’ para proporcionar aos adolescentes ferramentas e coñecementos para xestionar as súas finanzas.