ABANCA gaña o Premio Expansión e Emprego á Creatividade coa súa iniciativa ‘Marca a diferenza’
- O concurso tiña como obxectivos principais dinamizar e asimilar os novos protocolos de actuación postos en marcha pola entidade financeira
Membros do equipo de Capital Humano de ABANCA
A directora xeral de Capital Humano de ABANCA, María Camino, recibindo o Premio Expansión e Emprego
ABANCA vén de recibir o Premio Expansión e Emprego 2015 á Creatividade pola súa iniciativa ‘Marca a diferenza’, un concurso organizado pola entidade financeira entre os seus empregados para conseguir unha atención diferenciada aos clientes baseada nos valores corporativos.
A directora xeral de Capital Humano, María Camino, foi a encargada de recoller o galardón na gala que se celebrou onte pola tarde en Madrid e na que se recoñeceron as iniciativas máis innovadoras en Recursos Humanos. “Este premio é de todas as persoas que formamos ABANCA porque con ‘Marca a diferenza’ conseguimos todos xuntos pór en marcha unha acción de difusión innovadora que nos serviu para incrementar a calidade de atención externa e interna”, sinala María Camino.
Organizados polo diario económico Expansión, coa colaboración do IE Business School, a XIII Edición dos Premios Expansión e Emprego 2015 contou coa participación de numerosas empresas que presentaron as súas iniciativas. O xurado escolleu 10 propostas ás que recoñeceu en tres categorías: Creatividade, Orientación a resultados e Orientación Humana. A iniciativa ‘Marca a diferenza’ de ABANCA foi a gañadora na categoría de creatividade.
O concurso ‘Marca a diferenza’ consistía en gravar un vídeo no que se simulasen situacións que servisen de exemplo para a correcta aplicación do catro protocolos de actuación que a entidade acababa de poñer en marcha: Actitude de servizo, Atención Presencial, Atención telefónica, Orde e imaxe de oficina. Os obxectivos principais eran dinamizar e asimilar estes protocolos de actuación. 50 equipos, formados por dous ou tres profesionais cada un, presentaron os seus vídeos ao concurso, nos que se escenificaban as pautas establecidas en cada un dos protocolos.