ABANCA impulsa a educación financeira de 3.000 escolares de Vigo coa obra de teatro ‘De los cuentos a las cuentas’

19-10-2018

ABANCA achegará a próxima semana a máis de 2.966 escolares de 5º e 6º de Primaria de 49 colexios de Vigo e a súa área metropolitana a importancia do aforro e o esforzo para alcanzar as metas que se propoñan. Farao a través da obra de teatro ‘De los cuentos a las cuentas’, producida por Zarándula por encargo do banco como parte do seu programa de educación financeira.

O Teatro de Afundación en Vigo acollerá entre o luns 22 e o mércores 24 seis representacións desta proposta escénica, con dúas funcións cada día, ás 10.00 e ás 12.00 horas. É a segunda vez que se pon en escena na cidade esta montaxe teatral, tras a súa estrea en 2016.

A obra ten como obxectivo fundamental transmitir, a través de contos tradicionais, a importancia dunha xestión adecuada do diñeiro no día a día, o valor do esforzo, o sentido da previsión e o aforro e tamén a importancia da solidariedade.

‘De los cuentos a las cuentas’ é unha das dúas montaxes teatrais promovidas por ABANCA nos últimos dous anos co fin de aproveitar o potencial das artes escénicas para captar a atención do público infantil e conseguir trasladarlle conceptos que doutro xeito resultaría complicado explicar a nenos e nenas de pouca idade.

A proposta escénica forma parte do programa de educación financeira que desenvolve o banco, en colaboración con Afundación, ao longo de todo o ano, e que inclúe tamén outras iniciativas dirixidas aos máis pequenos como o Gran Prix Financeiro.