ABANCA inaugura a exposición 'Lugrís, Paredes soñadas'

ABANCA inaugurou na sede de Afundación da Coruña a exposición Lugrís, paredes soñadas, organizada como complemento á recuperación do mural Vista de A Coruña 1669. Juan Carlos Escotet Rodríguez, vicepresidente de ABANCA, e Rubén Ventureira, comisario da exposición, estiveron arroupados no acto de apertura por un centenar de representantes da vida política, social, cultural e empresarial que previamente puideron gozar tamén da pintura mural na súa actual localización, a entrada á sede do banco na Coruña pola rúa Olmos.

Escotet destacou na súa intervención que Urbano Lugrís é un dos grandes artistas galegos, que “irradiou, máis de catro décadas despois do seu falecemento, ese magnetismo artístico capaz de suscitar o consenso”. “Nas súas obras hai obxectos e escenas mariñas que todos podemos recoñecer sen dificultade e en ningunha falta ese algo máis, o contrasinal con que os grandes creadores deixan pegada do seu paso polo mundo”, sinalou.

Ademais, agradeceu o apoio recibido de Afundación, do grupo de profesionais que ofreceron as garantías necesarias para restaurar a pintura mural, e tamén de todos os “coleccionistas, institucións públicas e privadas, numerosos museos, confrarías, fundacións, o Concello da Coruña, bibliotecas, entidades académicas, o Parlamento de Galicia e a Xunta de Galicia, o Arquivo Histórico Municipal A Coruña e o Arcebispado de Santiago de Compostela, que permitiron reunir e facer posible esta coidada mostra”.

A exposición e o mural recuperado poderán visitarse desde o venres 31 de marzo ata o 2 de setembro.