ABANCA incorpora un equipo senior de Debt Advisory

ABANCA incorporou un equipo senior de Debt Advisory, formado por Federico Silva e Javier Barrenechea, ao departamento de Orixinación de Mercados, responsabilidade de José de Pablo. Esta incorporación ten por obxectivo axudar ás empresas a xestionar, optimizar e obter financiamento por canles non tradicionais, ben con investidores en operacións privadas, ou ben saíndo ao mercado de capitais.

Federico Silva e Javier Barrenechea contan cunha traxectoria de máis de 20 anos en banca de investimento (financiamento estruturado e advisory) en institucións financeiras nacionais e internacionais. Os dous traballaron para grandes clientes internacionais e pecharon operacións tanto en mercado público como en formato private debt e en múltiples sectores.

A incorporación a ABANCA do equipo de Debt Advisory, integrado na Dirección Xeral de Mercado de Capitais, Xestión e Distribución que dirixe Juan Luis Vargas-Zúñiga de Mendoza, enmárcase na vontade da entidade de ofrecer un servizo cada vez máis completo ao mundo empresarial e xerar produto para os seus clientes investidores nunha contorna na que cada cliente e cada operación requiren solucións tailor-made.

ABANCA actuará potenciando o mercado de negocio de empresas, ampliando a súa actual oferta de produtos co fin de satisfacer aos clientes que poidan estar pensando en crecementos potenciais ou mellora das súas estruturas de financiamento.