ABANCA incrementa o seu volume de negocio minorista en 6.500 millóns coa adquisición de Deutsche Bank PCC Portugal

27-03-2018

ABANCA resultou gañadora no proceso formal de venda da unidade de banca de particulares de Deutsche Bank’s Private & Commercial Client (‘PCC’) Portugal. Con esta operación, ABANCA aumenta o seu negocio internacional e gaña presenza no segmento de banca persoal e privada, áreas nas que Deutsche Bank PCC Portugal está especializado. Ademais, Deutsche Bank e ABANCA manterán no futuro colaboración comercial en Portugal. A compra permite a ABANCA unha mellora do 5,0% da marxe de intereses e aumentar un 20% os ingresos por comisións. ABANCA contou co apoio de Clifford Chance como asesor legal e de Nomura como asesor financeiro.

O negocio comprado por ABANCA consta de 41 oficinas comerciais, distribuídas polas principais cidades de Portugal, especialmente en Lisboa e Oporto; delas hai catro centros de investimento e dúas oficinas de banca privada. Deutsche Bank PCC Portugal conta cunha carteira crediticia bruta de 2.400 millóns de euros, 1.000 millóns de euros en depósitos e 3.100 millóns de euros fóra de balance, cifras que elevan o seu volume de negocio aos 6.500 millóns de euros. O persoal que xestiona o negocio en Portugal duns 50.000 clientes está composto por 330 empregados e empregadas e 100 axentes externos.

A operación forma parte da estratexia internacional de ABANCA de crecer en mercados e segmentos complementarios co seu proxecto.

Alta complementariedade xeográfica e comercial

O interese e a oferta de ABANCA pola compra do negocio e operativa de Deutsche Bank PCC Portugal responde a unha análise pormenorizada que evidencia a posibilidade de ampliar a área xeográfica de influencia e capacidade comercial de ABANCA.

A adquisición asinada hoxe permitirá a ABANCA reforzar a súa presenza en Portugal (catro oficinas ata agora) e mellorará as súas capacidades en negocios estratéxicos para a entidade como banca persoal e privada. Os 41 centros que pasarán a formar parte da rede de ABANCA serán tamén un vehículo para potenciar en Portugal o modelo de negocio de ABANCA, especialmente en empresas e seguros.

Deutsche Bank PCC Portugal, un banco recoñecido e diferenciado da súa competencia

Deutsche Bank PCC Portugal empezou a operar no mercado portugués no ano 1978 como banco de particulares e o seu principal foco está en clientes de banca privada con poder adquisitivo medio-alto. O foco do seu negocio está no asesoramento a clientes de banca persoal e privada, cun modelo de negocio centrado na comercialización de produtos financeiros que lle situou como líder do mercado portugués na distribución de fondos internacionais.

O seu enfoque comercial é claramente diferente da súa competencia en Portugal, e é unha franquía moi valorada nos segmentos de banca persoal e privada.

En 2014 foi recoñecido como o primeiro banco en Portugal en distribución de produtos estruturados. Tamén foi premiado como o mellor banco de asesoramento en Portugal en 2015, 2016 e 2017 por Global Banking & Finance Review.

Integración total no primeiro semestre de 2019

O calendario da operación de compra finalizará no primeiro semestre de 2019, unha vez recibidas todas as autorizacións e concluída a integración tecnolóxica. O equipo de IT de ABANCA conta cunha gran experiencia neste tipo de procesos e realizou integracións similares en operacións corporativas previas.

Unha vez finalizada a integración, ABANCA reforzarase nun mercado como o portugués que espera crecementos positivos nos próximos anos acompañados dunha recuperación do emprego.