ABANCA inicia un programa para facilitar a incorporación da mocidade ao mercado laboral
- ABANCA formará os estudantes en produtos financeiros, coñecemento do negocio, protocolos comerciais ou control interno
ABANCA vén de lanzar ‘Experiencia ABANCA’, un programa enfocado a atraer o talento das universidades de Galicia, León e Asturias, facilitando a incorporación ao mercado laboral a un total de 74 titulados recentes. A través dun proceso de selección transparente e profesionalizado que incluíu dinámicas de grupo e entrevistas persoais, ABANCA contribúe a facilitar o tránsito entre a etapa formativa e o inicio da carreira profesional.
‘Experiencia ABANCA’ buscou candidatos entre os titulados recentes de ADE, Empresariais, Económicas, Ciencias Políticas ou Dereito das universidades de Santiago de Compostela, A Coruña, Vigo, León e Asturias, así como da Escola de Negocios Afundación. Tamén se seleccionaron alumnos de programas de posgrao da Escola de Finanzas da Coruña, dos master en Banca e Finanzas da Universidade de Santiago e a Universidade de Vigo ou do MBA da Escola de Negocios Afundación. A entidade financeira realizou sesións de presentación nos centros desta iniciativa socialmente responsable.
Os mozos e mozas escollidos incorporaranse á entidade con todas as garantías laborais a través dun contrato en prácticas de entre seis e sete meses, remunerado e a tempo completo. “Todos terán a opción de desenvolver as súas aptitudes e poñer en práctica os coñecementos teóricos asimilados durante a súa formación, así como coñecer un entorno laboral real e perfilar unha orientación profesional”, segundo a directora xeral de Capital Humano María Camino. Ademais, poderán aportar unha nova visión aos profesionais de ABANCA, transmitindo oportunidades de mellora en función da súa experiencia.
Experiencia práctica
ABANCA completará a formación dos candidatos seleccionados cun curso teórico-práctico de introdución que inclúe coñecementos específicos en produtos financeiros, coñecemento do negocio, protocolos comerciais, control interno ou ferramentas de traballo. Unha vez completado este curso, o banco seguirá apostando pola súa formación e a asimilación progresiva de coñecementos, grazas a cursos específicos de seguridade en oficinas, xestión de efectivo, prevención de branqueo de capitais ou seguros. Tamén se organizarán obradoiros formativos para ampliar coñecementos en tarxetas, banca electrónica, pasivo e seguros.
A experiencia profesional dos titulados recentes durante estes seis ou sete meses verase en todo momento tutelada por profesionais da entidade financeira. Os directores das oficina nas que traballen e Capital Humano encargaranse de facer un seguimento personalizado e avaliarán cualitativa e cuantitativamente o seu desempeño, co fin de construír unha canteira de futuro para a entidade.