ABANCA lanza a primeira aplicación de Banca Móbil totalmente accesible para persoas con discapacidade

20-05-2015

ABANCA acaba de lanzar unha nova versión da súa aplicación de Banca Móbil para iPhone totalmente accesible para persoas con discapacidade, coa que logrou o selo de accesibilidade universal. Esta certificación garante que pode ser utilizada por persoas con calquera tipo de discapacidade, incluíndo a visual parcial e a cegueira.

O selo de accesibilidade universal é o resultado final do proceso de certificación realizado por ILUNION Accesibilidade, Estudios y Proyectos, empresa especializada pertencente ao grupo empresarial da ONCE e a súa Fundación.

Actualmente ABANCA é a única entidade financeira en España que conta con este certificado de accesibilidade para a súa aplicación de Banca Móbil, a primeira de todo o sistema financeiro español que cumpre cos estándares de accesibilidade. Con esta iniciativa, ABANCA e o ONCE contribúen á supresión de barreiras que impiden ou dificultan a plena integración social das persoas con discapacidade.

“Desde sempre mantivemos un alto compromiso coa accesibilidade en todas as nosas canles a distancia.  É un orgullo para nós lograr este fito, sobre todo, porque conseguimos que os clientes con discapacidade poidan acceder aos servizos financeiros en igualdade de condicións que o resto”, sinalou Miguel Ángel Escotet, director xeral de Responsabilidade Social Corporativa e Comunicación de ABANCA, durante a presentación da versión da Banca Móbil adaptada para persoas con discapacidade de ABANCA que tivo lugar esta mañá na Coruña. No acto tamén participaron o director xeral de Información, Procesos e Operacións de ABANCA, José Manuel Valiño Blanco, o delegado do ONCE en Galicia, Manuel Martínez Pan, e o presidente do consello territorial ONCE-Galicia, Carlos Fernández Lamigueiro.

Ademais, o acto contou coa presenza de Juan Carlos Buño, un usuario invidente que compartiu a súa experiencia no manexo da nova aplicación de Banca Móbil de ABANCA.

Asesoramento de ILUNIÓN Accesibilidad, Estudios y Proyectos

Neste proceso de adaptación, ABANCA contou coa colaboración de ILUNION Accesibilidad, Estudios y Proyectos, unha empresa especializada en tecnoloxía e accesibilidade pertencente ao grupo empresarial da ONCE e a súa Fundación que certificou a auditoría desta nova versión da súa banca móbil, confirmando a concesión do selo de accesibilidade que acredita que a aplicación pode ser usada por persoas con discapacidades visuais, auditivas e físicas.

O delegado territorial do ONCE, Manuel Martínez Pan, destacou os beneficios deste tipo de iniciativas na superación de barreiras e agradeceu o xesto de ABANCA ao permitir -dixo-“que as persoas con cegueira ou discapacidade visual grave podamos ter a banca electrónica ao noso alcance, en igual cos demais cidadáns, e podamos así xestionar desde os nosos teléfonos móbiles as contas, os fondos, recargas de móbiles, etc.”

Tecnoloxía VoiceOver

A aplicación está totalmente integrada cos requirimentos técnicos de accesibilidade do sistema operativo dos dispositivos móbiles e tabletas de Apple, o que permite a correcta utilización do lector de pantallas que traen integrados, o VoiceOver. Esta tecnoloxía facilita ao usuario a lectura e a navegación. As persoas con discapacidade visual escoitarán unha descrición detallada do que hai en pantalla e esta tecnoloxía vailles guiando para seleccionar unha opción do menú ou pulsar calquera botón. VoiceOver vai ofrecendo tamén información externa contextual que fai máis precisa a súa utilización e axuda ao usuario a manexar a aplicación. Esta tecnoloxía tamén permite que exista un contraste de cores adecuado entre textos e fondos ou que cada usuario poida utilizar textos ampliados ou cores personalizadas para as súas capacidades visuais específicas.

 “Para nós, o primordial son os nosos clientes e as súas necesidades. Observamos que os que tiñan algunha discapacidade visual reclamábannos unha accesibilidade completa e ofrecíanse a colaborar. Así que, puxémonos a traballar e despois de moito esforzo e probas aquí está o resultado. Foi un traballo gratificante e merecen toda a nosa consideración e atención polo feito de tentar utilizar a tecnoloxía cando lles require, na maioría das ocasións, o dobre de esforzó”, asegurou José Manuel Valiño Blanco.

Crecemento do uso da Banca Móvil

ABANCA pechou o primeiro trimestre de 2015 con máis de 250.000 clientes que operan de forma habitual a través do teléfono móbil, un 55% máis que no mesmo período do ano anterior. De total de clientes que se conectan a distancia (banca electrónica, banca móbil, banca telefónica), o 45% faio principalmente a través do móbil. O número de operacións (consulta de movementos, transferencias, traspasos, etc.) que se realizaron a través do móbil durante o primeiro trimestre de 2015 superou os 10 millóns, case tres veces máis que as realizadas no mesmo período do ano anterior.