ABANCA lanza a terceira edición do programa Segura-Mente para educar as futuras xeracións no aforro sostible

30-10-2020

ABANCA puxo en marcha a terceira edición do seu programa de educación financeira Segura-Mente ABANCASerás redirixido a outro sitio web coincidindo coa celebración do Día Mundial do Aforro o sábado 31 de outubro. Nesta convocatoria, a proposta educativa, que se enmarca no programa de RSC do banco, preséntase baixo o título ‘Segura-Mente. Emprende a túa viaxe: Un plan cheo de aventuras’ e simula os distintos percorridos do Camiño de Santiago.

Este ano o Día Mundial do Aforro céntrase no aforro ligado á sostibilidade, xa que aforrar non só supón un beneficio para o noso peto, senón que pode contribuír ao benestar de todos e reducir o impacto no medio ambiente. Por iso, nesta terceira edición do programa, ABANCA vai un paso máis aló da educación financeira e fixo un gran esforzo por sensibilizar a mozos no aforro sostible.

Para iniciar a súa andaina, os alumnos e alumnas de Educación Primaria, Secundaria ou FP Básica que queiran participar nesta aventura inmersiva terán que facerse tres preguntas que sempre nos asaltan antes de emprender unha viaxe: que tipo de seguro vou contratar?, que tipo de aloxamento? e canta equipaxe preparo? A continuación, nas diferentes paradas do camiño, o alumnado atoparase con probas en forma de preguntas ou xogos de habilidade relacionados con finanzas, materias troncais (Arte, Xeografía, Historia…) ou centradas especificamente nos Obxectivos de Desenvolvemento Sostible (ODS), con desafíos como eliminar os residuos que ensucian o fondo mariño galego.

A través deste recurso baseado na gamificación, o alumnado porase á fronte de diversas situacións nas que terán que reflexionar e asumir responsabilidades para aprender as consecuencias de cada decisión. Así, durante a súa viaxe inmersiva de peregrinación a Santiago de Compostela irá enfrontándose a distintos contratempos simulados, desde o roubo dun móbil até unha dor insoportable de moas, consolidando a súa capacidade para xestionar riscos e axustar as súas decisións de investimento e consumo ás súas necesidades e expectativas futuras.

Nun momento no que o distanciamento físico é fundamental, esta singular aventura dixital convértese nunha ferramenta efectiva para aprender de forma lúdica, tanto na aula como no fogar, xa sexa en grupo ou de forma individual. Ademais, gañar o concurso de educación financeira Segura-Mente ten premio. Un xurado valorará o mellor proxecto de Educación Primaria e Secundaria e a aula elixida poderá gañar unha experiencia valorada en 1.000 euros como recompensa.