ABANCA lanza o seu primeiro seguro de fogar, que o cliente pode personalizar e pagar mes a mes

02-11-2022

ABANCA presentou esta mañá na Coruña o seu primeiro seguro propio de fogar, un produto sinxelo, modular e totalmente personalizable, que o cliente pode configurar en función do seu perfil, as súas necesidades de protección e as características da súa vivenda.

O director xeral de ABANCA Seguros, Álvaro García Diéguez, e a directora comercial da división, Sonia Lucio, foron os encargados de expoñer as características e vantaxes diferenciais do seguro, acompañados polo coñecido copiloto de rally Luis Moya, prescritor da división aseguradora do banco. O acto desenvolveuse nun espazo temporal instalado na oficina principal de ABANCA na Coruña no que se representaba o salón dunha casa e que serviu como antesala da campaña de publicidade que se lanzará nos próximos días para dar a coñecer o novo produto, co slogan ‘Un seguro tan teu como o teu fogar’.

Vantaxes competitivas

Seguindo a filosofía dos seguros propios de ABANCA, a nova oferta do banco para o ramo de fogar destaca pola súa flexibilidade e innovación, ademais de polas súas coberturas diferenciais. “É un seguro que cada cliente pode modelar como un traxe a medida grazas a diferentes escalas de personalización, e pagar polo que realmente necesita”, sintetizou Álvaro García.

Lanzado a través da filial ABANCA Seguros Generales, o novo seguro de fogar de ABANCA inclúe vantaxes competitivas e dispoñibles en todas as pólizas, como o servizo ‘Manitas’, a reparación e substitución de electrodomésticos ou a cobertura de danos por auga, entre outras. Ademais, desde o primeiro momento o cliente pode adaptar as coberturas -e capitais- ás súas circunstancias e necesidades de protección. “Pode configurar o seu seguro en función de se é propietario ou inquilino, se quere asegurar a súa vivenda habitual ou unha segunda residencia ou do nivel de protección desexado, entre outras opcións, e elixir entre un amplo abanico de garantías e servizos adicionais”, detallou Sonia Lucio. Por exemplo, é posible engadir á póliza un paquete específico de mascotas, cobertura de piscinas ou mesmo ampliar indemnizacións por xoias ou obxectos de valor especial.

O cliente poderá contratar e xestionar o seu seguro de fogar a través da Plataforma ABANCA Seguros Omnicanal, ferramenta dixital dispoñible tanto desde as oficinas como desde as canles a distancia. Unha vez contratado, poderá complementar a súa póliza con opcións ON-OFF como a asistencia en viaxes ao estranxeiro ou a cobertura de bicicleta ou patinete eléctricos, que poderá activar ou desactivar cando queira, pagando unicamente polos días de uso.

Novos seguros de negocios e de vida risco

Este innovador produto é o quinto seguro propio que a entidade financeira galega coloca no mercado a través da súa división ABANCA Seguros. Tras a súa estrea en 2021 co seu seguro de coche ‘Copiloto’ e unha solución integral de vida e protección de pagos, o banco lanzou durante o primeiro semestre deste ano un seguro multirrisco para negocios e un produto de vida risco.

Deseñado e desenvolvido por ABANCA Vida y Pensiones, o novo seguro de vida de ABANCA simplifica nun único produto coberturas e garantías que poden configurarse en función das distintas fases vitais e demandas de protección familiar, axustando incluso o capital a necesidades que poidan xurdir no futuro. Este seguro incorpora, ademais, un compoñente de responsabilidade social: por cada póliza contratada, ABANCA Vida e Pensións doará un euro á iniciativa social que elixa o cliente entre as impulsadas por Afundación, a Obra Social de ABANCA.

Pola súa banda, o novo seguro de negocios de ABANCA, desenvolvido por ABANCA Seguros Generales, está dirixido a autónomos, comercios e pemes, e engloba os clásicos produtos multirrisco nunha única proposta de valor personalizada en función da actividade de cada negocio e das necesidades do cliente. Ademais da súa personalización con garantías, paquetes opcionais e vantaxes ON-OFF, conta cunha serie de coberturas diferenciais para todos os asegurados, como a defensa xurídica ilimitada, a asistencia xurídica telefónica 24 horas e a axuda ao cliente coa dixitalización do seu negocio.

Facilidades de pago

Unha das grandes vantaxes competitivas destes novos produtos é a súa facilidade de pago. Grazas á Tarifa Plana de ABANCA Seguros, coa que o banco galego foi pioneiro no sector en 2016, o cliente pode agrupar as pólizas dos seus seguros nun único recibo e fraccionar o pago de forma gratuíta en cómodas cotas mensuais. Ademais, poderá aprazar, tamén sen xuros nin comisións, ata dúas cotas mensuais ao ano, e aforrar ata un 7% do recibo mensual, en función dos seguros que teña domiciliados.

Co lanzamento destes tres novos produtos, ABANCA dá un impulso significativo a unha liña de negocio considerada estratéxica e ao seu modelo de relación omnicanal centrado no cliente. O banco ten previsto seguir ampliando a súa oferta aseguradora propia nos próximos meses con novos produtos e ramos para particulares.