ABANCA mantén os seus patrocinios en deporte base e profesional a pesar da suspensión das competicións
- A medida quere contribuír a proporcionar aos clubs, especialmente de base, e aos deportistas un marco de estabilidade orzamentaria, que lles permita dar continuidade ao seu proxecto deportivo e manter o emprego
Descarga en alta resolución Serás redirixido a outro sitio web e abrirase nunha nova ventá
ABANCA abonará aos clubs deportivos cos que mantén acordos de patrocinio o importe completo correspondente á presente tempada, a pesar da suspensión das competicións derivada da actual situación de alarma de saúde pública. A decisión do banco ten por obxectivo contribuír a proporcionar aos clubs un marco de estabilidade orzamentaria que lles permita dar continuidade ao seu proxecto deportivo e manter o emprego.
O programa de patrocinio deportivo de ABANCA desenvólvese en dúas grandes liñas. Por unha banda, ABANCA é patrocinador, en varios casos principal, dos principais equipos galegos de fútbol masculino e feminino (RC Celta de Vigo, RC Deportivo da Coruña, CD Lugo) e de baloncesto (Obradoiro CAB Santiago, CB Breogán Lugo), así como do Club Balonmán Ademar León.
Doutra banda, o banco colabora coa Fundación Deporte Galego no Plan de Patrocinio dos Equipos de Alta Competición de Galicia. A través deste plan, o banco proporciona apoio a 181 clubs de 34 disciplinas deportivas, cun total de 1.749 equipos e 14.500 deportistas.
Todos estes clubs recibirán nas datas previstas as cantidades estipuladas nos acordos de patrocinio que manteñen con ABANCA.
A medida súmase a outras tomadas polo banco nas últimas semanas para tratar de paliar as consecuencias económicas, sanitarias e sociais da expansión do COVID-19.