ABANCA optimiza as oficinas de empresas con máis especialización, tecnoloxía e atención
- O centro está dotado con equipamento tecnolóxico de última xeración que facilita a mobilidade e reduce tempos de espera e procesos
- O persoal da oficina destaca polo seu alto nivel de especialización en áreas de negocio como comercio exterior, seguros e produtos de tesourería
- Máis de douscentos empresarios asisten á inauguración da oficina, acompañados polos principais directivos do banco
- A entidade prima este ano o negocio con pemes e empresas e prevé conceder 11.000 millóns en novo crédito a este segmento ata 2018
O vicepresidente, o conselleiro delegado e o director territorial de Vigo durante a inauguración da oficina de empresas.
O vicepresidente, o conselleiro delegado e o director territorial de Vigo interveñen na inauguración da oficina de empresas.
Panorámica do acto de inauguración da oficina de empresas.
ABANCA presentou hoxe a súa nova oficina de empresas en Vigo, coa que mellora o servizo a este segmento de clientes a través dunha atención máis personalizada, unha maior especialización e elementos tecnolóxicos de última xeración.
O centro, localizado no baixo da sede institucional do banco en Vigo, está en consonancia co modelo de atención especializada a empresas que está impulsando a entidade financeira galega. Conta cun equipo de trece profesionais cun elevado nivel de especialización, entre os que figuran xestores especialistas en áreas de negocio moi requiridas polas empresas, como son o comercio exterior, os seguros e os produtos de tesourería.
A oficina ten unha superficie de máis de 300 metros cadrados, con espazos abertos e sen barreiras, repartidos en catro zonas diferenciadas: distribución, xestión comercial especializada, asesoramento e back office. A atención ao cliente concéntrase na zona de asesoramento, con catro salas de reunións que permiten maior privacidade e unha atención máis personalizada.
Este novo espazo está dotado co equipamento e funcionalidades tecnolóxicas máis innovadoras do mercado, que facilitan a mobilidade dos xestores e reducen tempos de espera e procesos. Todos os xestores contan con tabletas Microsoft Surface, dispositivos de traballo con funcionalidade de PC que permiten atender ao cliente en calquera lugar, incluso na súa propia empresa.
A oficina de empresas de Vigo é a primeira da rede de empresas do banco adaptada ao novo modelo de oficina ABANCA, deseñado para mellorar a calidade de servizo ao cliente a través de solucións tecnolóxicas de última xeración, amplos espazos abertos (non hai mostradores nin despachos) e zonas diferenciadas en función do servizo que se preste ao cliente. Esta nova organización das oficinas da entidade financeira galega obedece a un modelo de relación co cliente máis funcional, próximo, innovador, eficiente e sostible.
Negocio con empresas, prioritario en 2016
Á presentación da nova oficina asistiron máis de 200 empresarios de Vigo e a súa zona de influencia, acompañados polos principais directivos de ABANCA e distintos cargos da área de empresas da entidade. Durante o acto, o vicepresidente de ABANCA, Juan Carlos Escotet, resaltou que “as empresas son un segmento de negocio prioritario para ABANCA e ímoslle dar un impulso durante este ano”. “Queremos seguir sendo o principal aliado do tecido empresarial galego apoiándoo, principalmente a través do financiamento, tanto no seu día a día coma nos seus proxectos de crecemento e expansión internacional”, sentenciou. Pola súa banda, o conselleiro delegado, Francisco Botas, anunciou que “o plan de impulso á empresa que deseñou a entidade para 2016 contempla crecementos de dous díxitos tanto en financiamento de circulante coma en préstamos a longo prazo para apoiar novos proxectos de investimento”. “Para desenvolver este plan contamos con dous elementos diferenciais no mercado: a nosa especialización e coñecemento do tecido empresarial galego e a capilaridade da nosa rede de oficinas, a maior de Galicia”, explicou.
ABANCA contempla no seu plan de negocio un obxectivo de concesión de 11.000 millóns de euros en novo crédito para a empresa durante os próximos tres anos. A entidade financeira financia ao 61% das pemes e empresas galegas con débeda bancaria, e suma 12.900 millóns de euros na súa carteira de investimento empresarial. O banco ten na súa base de clientes máis de 272.000 empresas e autónomos.