ABANCA pecha a adquisición do negocio de Novo Banco en España
- A operación prodúcese tras a recepción das autorizacións do Ministerio de Asuntos Económicos e Transformación Dixital e da Comisión Nacional dos Mercados e a Competencia
- Con esta compra, que é a sexta operación corporativa da entidade desde 2014, ABANCA supera os 107.000 millóns de volume de negocio
- A entidade incrementa a súa actividade en España en banca privada e persoal, e de empresas
De esquerda a dereita na imaxe, o presidente de ABANCA, Juan Carlos Escotet Rodríguez, o conselleiro delegado de Novo Banco, Antonio Ramalho, e o conselleiro delegado de ABANCA, Francisco Botas.
Exemplo de adaptación das canles dixitais de Novo Banco en España á imaxe corporativa de ABANCA.
ABANCA e Novo Banco S.A. pecharon hoxe a compravenda do negocio do banco portugués en España, unha vez recibidas as autorizacións do Ministerio de Asuntos Económicos e Transformación Dixital e da Comisión Nacional dos Mercados e a Competencia. O acto de firma tivo lugar na sede institucional de ABANCA en Madrid e participaron por parte de ABANCA o seu presidente, Juan Carlos Escotet Rodríguez, e o seu conselleiro delegado, Francisco Botas, mentres que Novo Banco estivo representado polo seu conselleiro delegado Antonio Ramalho.
Con esta operación, ABANCA supera os 107.000 millóns de euros de volume de negocio, e reforza o seu posicionamento en dous ámbitos de actividade prioritarios: o negocio de banca persoal e privada, e o negocio de empresas. A adquisición, que supón a integración contable do negocio adquirido, presenta un baixo risco de execución e mínimo consumo de capital, ao redor de 25 puntos básicos en CET1, inferior ao estimado inicialmente.
As oficinas de Novo Banco terán desde este momento acceso á plataforma tecnolóxica de ABANCA para ofrecer aos seus clientes a posibilidade de contratar produtos e servizos do catálogo ABANCA. Ademais, as oficinas, redes sociais e canles dixitais de Novo Banco comezarán a partir de hoxe a incorporar a imaxe corporativa de ABANCA.
Para completar a atención que seguirán prestando as oficinas adquiridas, ABANCA establecerá nunha serie de oficinas da súa rede, situadas en Santander, Donostia-San Sebastián, Pamplona, Granada, Alacante, A Coruña e Xixón, corners diferenciados para proporcionar servizos específicos aos clientes de Novo Banco en cada unha desas áreas.
Operación complementaria en mercado e estratexia
A operación robustece o posicionamento de ABANCA en España, moi especialmente en Madrid. Tamén reforza os segmentos estratéxicos de banca privada e persoal e empresas, neste último caso especialmente na operatoria de fóra de balance e a actividade exterior.
Novo Banco achegará potencial de crecemento en liñas como o negocio asegurador. Esta actividade atópase en pleno crecemento en ABANCA tras o relanzamento da compañía de Vida e a creación de ABANCA Seguros Generales conxuntamente con Crédit Agricole Assurances, que xa lanzou ao mercado os seus primeiros produtos propios.
Así mesmo, as importantes sinerxías que presenta a operación permitirán a ABANCA avanzar na mellora da súa eficiencia.
Os clientes de Novo Banco beneficiaranse de maiores capacidades tecnolóxicas, atención persoal nunha rede de 631 oficinas en España e 686 en todo o mundo, acceso a 1.145 caixeiros automáticos propios e outros 14.500 froito dos acordos con Euro 6000 e outras entidades financeiras, especialización en segmentos como empresas, banca privada e persoal, seguros, agro, mar, e crédito ao consumo, maior diversificación do catálogo de produtos, e presenza internacional en 11 países de Europa e América.
Próximos pasos
Unha vez pechada por ambas as partes, a operación completarase coa realización do proceso de integración tecnolóxica que previsiblemente terá lugar no último trimestre de 2022. ABANCA acumula unha contrastada experiencia na realización de integracións, campo no que acumula unha acreditada capacidade grazas ao desenvolvemento exitoso de varias operacións nos últimos anos.
A primeira foi a integración en 2014 do Banco Etcheverría. En 2017 realizouse a compra de Popular Servicios Financieros. En 2018 ABANCA adquiriu Deutsche Bank PCB. Tamén en 2018 comprou a Caixa Geral de Depósitos o seu banco en España, Banco Caixa Geral. En 2020 produciuse a compra de Bankoa, cuxo proceso de integración completouse con éxito nas últimas semanas.